वैभववाडी पंचायत समिती सभेत कॉपी प्रकरणासह विविध प्रश्नांवर चर्चा

2026-05-24 00:00:00

टाइम्स स्पेशल

वैभववाडी (प्रतिनिधी) - दहावी परीक्षेतील गैर प्रकारामुळे वैभववाडी तालुक्याची बदनामी झाली आहे. गुणवत्तेत सर्वात पुढे असलेल्या तालुक्याच्या गुणवत्तेला डाग लागला आहे. त्यामुळे या प्रकरणातील माटेगावकर कोण? त्याचे नाव पुढे आले पाहिजे. झालेल्या बदनामीला शिक्षण विभाग जबाबदार आहे, प्रकरणाची सखोल चौकशी करून संबंधित दोषीवर गुन्हे दाखल करा. असे सभापती सिद्धेश रावराणे यांनी केले आहे. वैभववाडी पंचायत समिती मासिक सभा सभापती सिद्धेश रावराणे यांच्या अध्यक्षतेखाली वीर शिरोमणी महाराणा प्रतापसिंह सभागृहात पार पडली. यावेळी तालुक्यातील भुईबावडा केंद्रावर झालेल्या कॉपी प्रकरणाची जोरदार चर्चा झाली. या चर्चेत सर्व सदस्यांनी सहभाग घेत दोषीवर कठोर कारवाई करण्याची मागणी केली. यावेळी उपसभापती साची कोलते, सदस्य देवानंद पालांडे, सुवर्णा संसारे, साधना नकाशे, गटविकास अधिकारी प्रिमेश वाघ, सर्व खाते प्रमुख उपस्थित होते.दहावीच्या परीक्षेदरम्यान गैरप्रकार झाल्याचे उघड झाले आहे. त्यामुळे वैभववाडी तालुक्यासह सिंधुदुर्ग जिल्ह्यात मोठी खळबळ माजली आहे. त्याचे पडसाद आज झालेल्या वैभववाडी पंचायत समिती मासिक सभेत उमटले.

https://ratnagiritimes.in//assets/images/2020/add/2020/sky22.jpg

याबाबत सदस्यांनी गटशिक्षणाधिकारी वडर यांच्याकडे या प्रकरणाची संपूर्ण माहिती देण्याची मागणी केली. तसेच तालुक्यात एवढी मोठी घटना घडत असताना आपल्याला याबाबत काहीच माहिती नाही. हे योग्य नाही, असे सभापती रावराणे यांनी सुनावले. यावर बोलताना वडर म्हणाले, याबाबत आपल्याला दोन दिवसांपूर्वी माहिती मिळाली आहे. याबाबत बोर्डाने परस्पर संबंधित केंद्रावरील शिक्षकांना चौकशीसाठी बोलावून त्यांची चौकशी केली आहे, असे सांगितले. तालुक्यात बसवण्यात आलेल्या स्मार्ट मीटर बाबत चर्चा करताना सभापती रावराणे म्हणाले, स्मार्ट मीटर बसवण्यासाठी वीज वितरण कंपनीकडून घाई करण्यात आली. मात्र त्यातील त्रुटी दूर करण्याकडे दुर्लक्ष केले जात आहे. त्यामुळे एकमेकांकडे बोटे दाखवून जबाबदारी झटकण्याचे काम केले जात आहे. त्यामुळे स्मार्ट मीटर बसवून तुम्ही लोकांना त्रास देत आहे. संबंधित वीज ग्राहकांना वेळेवर वीज बिल येत नाहीत. त्यामुळे विज बिल भरायला विलंब होत आहे आणि विलंब झाल्यानंतर आपल्याकडून तात्काळ वीज पुरवठा खंडित केला जात आहे. हे अत्यंत गंभीर आहे. वैभववाडी तालुक्यातील बहुतांश घरांमध्ये वयोवृद्ध व्यक्ती राहत आहेत. त्यांना ऑनलाईन मेसेज समजत नाही. काही भागात नेटवर्क प्रॉब्लेम आहे. त्यामुळे ग्राहकांना वेळेत बिल मिळाले पाहिजे. यापुढे जर असाच वीज पुरवठा खंडित केला तर आम्ही तुमच्या दारात येणार हे लक्षात ठेवा, असा इशारा सभापती रावराणे यांनी वीज वितरणचे अभियंता चव्हाण यांना दिला आहे.

टाईम्स स्पेशल

वैभववाडी तालुक्यातील एसटी बस अनियमित धावत असून त्याचा फटका सर्वसामान्य प्रवाशांना बसत आहे. सभागृहात बोलूनही प्रश्न सुटणार नसतील तर आम्हाला वेगळा मार्ग अवलंबवावा लागेल, असा इशारा देवानंद पालांडे यांनी एसटी महामंडळाच्या अधिकार्‍यांना दिला आहे. गरोदर मातांची सोनोग्राफी ही ग्रामीण रुग्णालय वैभववाडी येथे झाली पाहिजे. सोनोग्राफीसाठी गरोदर मातांना कणकवली येथे जावे लागत आहे. त्यामुळे या मातांची दिवसभर परवड होत आहे. तसेच कुटुंब नियोजन शस्त्रक्रिया सुद्धा ग्रामीण रुग्णालयात पार पाडण्याची मागणी पालांडे यांनी केली आहे. पावसाळा तोंडावर आला असून फोंडा-वैभववाडी-उंबर्डे मार्गावर अनेक ठिकाणी खड्डे पडले असून पावसाळ्यात याचा मोठा त्रास प्रवाशांना सहन करावा लागणार आहे. या अगोदर खड्डे बुजवण्याचे झालेले काम निकृष्ट दर्जाचे झालेले आहे. त्यामुळे आता डांबराने खड्डे भरा अन्यथा काम करू देणार नाही. आश्वासन देऊन वेळ मारून देऊ नका. असे खडे बोलत सदस्य मंगेश लोके यांनी सार्वजनिक बांधकाम विभागाच्या अधिकार्‍यांना सुनावले. तरळे-वैभववाडी राष्ट्रीय महामार्गावरील कोकिसरे रेल्वे फाटक नजीक सुरू असलेले रस्त्याचे काम थांबून त्या ठिकाणी पावसाळ्यात वाहतूक सुरळीत सुरू राहण्याच्या दृष्टीने तत्काळ उपाययोजना करण्याची मागणी सभापती रावराणे यांनी केली.