विठ्ठल नामाचा गजर! रत्नागिरीत रंगणार आषाढी वारीचा अभूतपूर्व भक्तीसोहळा

2026-07-24 00:00:00

टाइम्स स्पेशल

रत्नागिरी : रत्नागिरीकरांसाठी येणारा शनिवार भक्तीच्या रंगात न्हाऊन निघणारा ठरणार आहे. आषाढी एकादशीच्या पवित्र पर्वावर संपूर्ण रत्नागिरी शहर विठू माऊलीच्या गजराने दुमदुमून जाण्यासाठी सज्ज झाले आहे. वारी म्हणजे केवळ पायी चालण्याची परंपरा नसून तो प्रेम, समता, बंधुभाव आणि अथांग भक्तीचा एक दिव्य उत्सव आहे, याची प्रचिती या सोहळ्यातून येणार आहे. याच उदात्त भावनेने समस्त रत्नागिरीकरांना या अभूतपूर्व वारीमध्ये सहभागी होण्याचे आग्रहाचे आणि विनम्र आवाहन करण्यात आले आहे. रत्नागिरीमध्ये येत्या शनिवारी, २५ जुलै २०२६ रोजी या भव्य आषाढी वारीचे आयोजन करण्यात आले आहे.

https://ratnagiritimes.in//assets/images/2020/add/2020/sky22.jpg

भक्तीचा हा नयनरम्य सोहळा सकाळी ठीक ६:३० वाजता मारुती मंदिर सर्कल येथून सुरू होईल. मारुती मंदिर ते श्री विठ्ठल मंदिर अशा पारंपरिक मार्गावर ही वारी मार्गक्रमण करणार आहे. ज्ञानोबा-तुकाराम आणि माऊली माऊलीच्या अखंड नामघोषात, टाळ-मृदंगाच्या तालावर अवघी रत्नागिरी विठ्ठलमय होणार आहे. या वारीचे सर्वात मोठे वैशिष्ट्य म्हणजे यामध्ये कुठलाही जात, पंथ, वय किंवा व्यवसायाचा भेद असणार नाही. सर्व सीमा बाजूला सारून, समाजातील प्रत्येक घटक एकत्र येऊन या भक्तीच्या महासागरात लीन होणार आहे. या वारीत सहभागी होणे म्हणजे केवळ विठुरायाच्या चरणी नतमस्तक होणे नव्हे, तर आपल्या समृद्ध संस्कृतीचा वारसा जपणे, समाजात एकतेचा आणि प्रेमाचा संदेश पसरवणे आणि आपल्या पुढील पिढीला वारकरी संस्कारांची ओळख करून देणे आहे.

टाईम्स स्पेशल

'झडो भेद सारा, प्रेम वसे अंतरी... जोडू समाज अवघा, भेटे तेथीच हरी!' या सुंदर विचाराला सार्थ ठरवत रत्नागिरीची ही आषाढी वारी अत्यंत भव्य आणि दिव्य बनवण्याचा संकल्प करण्यात आला आहे. त्यासाठी सर्व नागरिकांनी आपल्या कुटुंबासह, मित्रपरिवारासह आणि लहान मुलांसह मोठ्या संख्येने उपस्थित राहावे. चला तर मग, या शनिवारी सकाळी विठ्ठल नामाचा गजर करूया आणि भक्तीच्या या अविस्मरणीय प्रवासाचे साक्षीदार होऊया. राम कृष्ण हरी!