मिरकरवाडा बंदराचा श्वास मोकळा; बिनकामाच्या नौकांवर मत्स्य विभागाचा हातोडा!

2026-09-23 00:00:00

टाइम्स स्पेशल

रत्नागिरी (जमीर खलफे) : रत्नागिरीतील महत्त्वाच्या मिरकरवाडा बंदरात मत्स्य व्यवसाय विभागाने पुन्हा एकदा धडक कारवाईचा बडगा उगारला आहे. बंदरामध्ये गेल्या अनेक वर्षांपासून विनावापर पडून असलेल्या मच्छीमारी नौका हटवण्याचे काम प्रशासनाकडून वेगाने सुरू करण्यात आले आहे. या संपूर्ण मोहिमेदरम्यान कोणताही अनुचित प्रकार घडू नये यासाठी पोलीस बंदोबस्तात ही कारवाई पार पाडली जात आहे. मिरकरवाडा बंदरामध्ये अनेक वर्षांपासून काही मच्छीमारी नौका एकाच जागी पडून होत्या. या नादुरुस्त आणि अकार्यक्षम नौकांमुळे बंदरात जागेचा मोठा प्रश्न निर्माण झाला होता. तसेच, कार्यरत असलेल्या अन्य मच्छीमार बांधवांच्या नौका लावताना आणि वाहतूक करताना यामुळे मोठा अडथळा निर्माण होत होता.

https://ratnagiritimes.in//assets/images/2020/add/2020/sky22.jpg

या समस्येची गंभीर दखल घेत मत्स्य व्यवसाय विभागाने संबंधित नौका मालकांना आधीच नोटिसा बजावल्या होत्या. मत्स्य व्यवसाय विभाग किंवा स्थानिक प्रशासनाकडून यापूर्वी तब्बल ३० मच्छीमार नौका मालकांना स्वतःहून नौका हटवण्यासाठी अंतिम नोटीस देण्यात आली होती. मात्र, दिलेली मुदत संपल्यानंतरही संबंधित नौका मालकांनी आपल्या विनावापर पडून असलेल्या नौका बंदरातून हटवण्यासाठी कोणतीही ठोस पावले उचलली नाहीत. त्यामुळे अखेर मत्स्य विभागाला स्वतः या नौका हटवण्याची प्रत्यक्ष कारवाई हाती घ्यावी लागली आहे.

टाईम्स स्पेशल

दरम्यान, यापूर्वी जानेवारी महिन्यात मिरकरवाडा बंदर परिसरात प्रशासनाने अनधिकृत झोपडपट्ट्यांवर बुलडोझर फिरवत मोठी अतिक्रमण विरोधी कारवाई केली होती. या कारवाईमुळे बंदराने सुटकेचा निःश्वास सोडला होता. त्यानंतर आता काही महिन्यांच्या अंतराने पुन्हा एकदा विनावापर नौकांवर कारवाई करण्यात आल्याने बंदर परिसर अतिक्रमणमुक्त होण्याच्या दिशेने महत्त्वाचे पाऊल पडले आहे. प्रशासनाच्या या आक्रमक भूमिकेमुळे बंदरातील अनधिकृत अडथळे दूर होण्यास मदत होणार असून शिस्तबद्ध मच्छीमारी व्यवसायासाठी ही कारवाई आवश्यक असल्याचे मानले जात आहे.