सावंतवाडी: इन्सुली येथे तिलारी कालव्याच्या पाईप्सना भीषण आग; जीवितहानी टळली

2026-02-25 00:00:00

टाइम्स स्पेशल

सावंतवाडी: सावंतवाडी तालुक्यातील इन्सुली येथे तिलारी कालवा प्रकल्पासाठी साठवून ठेवलेल्या पाईप्सना आज दुपारी भीषण आग लागली. ही घटना दुपारी १ च्या सुमारास घडली असून, आगीच्या प्रचंड भडक्यामुळे परिसरात काही काळ भीतीचे आणि गोंधळाचे वातावरण निर्माण झाले होते. तिलारी कालवा प्रकल्पांतर्गत उपसा सिंचन योजनेसाठी संबंधित ठेकेदाराने इन्सुली परिसरात मोठ्या प्रमाणात प्लॅस्टिक/फायबरचे पाईप डंप करून ठेवले होते. आज दुपारी अचानक या पाईप्सनी पेट घेतला. पाईप्सचे स्वरूप ज्वालाग्राही असल्याने आगीने अवघ्या काही मिनिटांत रौद्र रूप धारण केले आणि धुराचे लोट आकाशात उंचवर दिसू लागले.

https://ratnagiritimes.in//assets/images/2020/add/2020/sky22.jpg

आगीची माहिती मिळताच परिसरातील स्थानिक नागरिकांनी घटनास्थळी धाव घेतली. स्थानिकांनी आपापल्या परीने आग विझवण्याचे प्रयत्न सुरू केले आणि तातडीने अग्निशामक दलाला पाचारण केले. अग्निशामक दलाचा बंब वेळेत दाखल झाल्यामुळे आगीवर नियंत्रण मिळवणे शक्य झाले. या भीषण आगीत प्रकल्पाचे मोठे आर्थिक नुकसान झाले असले, तरी सुदैवाने कोणतीही जीवितहानी झालेली नाही. ही आग नेमकी कशामुळे लागली—शॉर्ट सर्किटमुळे, कचरा जाळताना लागलेल्या ठिणगीमुळे की अन्य काही कारणामुळे—याचे अधिकृत कारण अद्याप समजू शकलेले नाही. संबंधित शासकीय यंत्रणा आणि पोलीस या प्रकरणाचा अधिक तपास करत आहेत.