कुणकेरी हायस्कूलमध्ये 'मराठी भाषा गौरव दिन' व 'विज्ञान दिन' उत्साहात साजरा

2026-03-02 00:00:00

टाइम्स स्पेशल

सावंतवाडी (प्रतिनिधी) - कुणकेरी येथील आचार्य विनोबा भावे माध्यमिक विद्यालयात मराठी भाषा गौरव दिन आणि राष्ट्रीय विज्ञान दिन मोठ्या उत्साहात साजरा करण्यात आला. यावेळी विद्यार्थ्यांनी मायमराठीचा जागर करत, प्रत्येक गावात मराठी शाळा टिकवण्यासाठी संकल्प केला. कार्यक्रमाच्या अध्यक्षस्थानी मुख्याध्यापिका अर्चना संतोष सावंत होत्या. त्यांनी आपल्या भाषणात मराठी भाषेचे महत्त्व विशद करतानाच विज्ञान आणि भाषेची सांगड घातली. "अभिजात आमची माय मराठी, दुधावरची जशी साय मराठी" अशा ओळींमधून त्यांनी मराठीचा गौरव केला. त्या म्हणाल्या की, "मराठी ही केवळ भाषा नसून ती महाराष्ट्राची ओळख आहे. संतांनी तिला लोकभाषा बनवले, तर शिवछत्रपतींनी राजभाषेचा मान दिला. आता तिला 'अभिजात भाषेचा' दर्जा मिळाल्याने आपला अभिमान द्विगुणित झाला आहे."

https://ratnagiritimes.in//assets/images/2020/add/2020/sky22.jpg

विज्ञानाबद्दल बोलताना त्यांनी स्पष्ट केले की, आपल्या अवतीभवती घडणाऱ्या गोष्टींचा शोध घेणे आणि जिज्ञासा बाळगणे म्हणजे विज्ञान होय. मोबाईलमधून आवाज कसा पोहोचतो किंवा इंद्रधनुष्याला रंग कसे येतात, असे प्रश्न विद्यार्थ्यांनी विचारायला हवेत, असे त्यांनी आवर्जून सांगितले. यावेळी ज्ञानपीठ विजेते कवी कुसुमाग्रज (वि. वा. शिरवाडकर) आणि थोर भारतीय शास्त्रज्ञ सी. व्ही. रामन यांच्या प्रतिमांचे पूजन करण्यात आले. विद्यार्थी प्रवीण जंगले याने कार्यक्रमाचे विद्यार्थी अध्यक्षपद भूषवले आणि पोवाड्याच्या माध्यमातून मराठी भाषेच्या उगमाचा इतिहास मांडला. विज्ञान शिक्षक मिहीर राणे यांनी विद्यार्थ्यांना विज्ञान दिनाचे महत्त्व पटवून दिले. व्यासपीठावर शिक्षिका कांबळी यांचीही उपस्थिती होती. या दिनानिमित्त शाळेत विज्ञानावर आधारित वैज्ञानिक प्रदर्शन आणि मराठी साहित्यावर आधारित पुस्तक प्रदर्शन भरवण्यात आले होते. सूत्रसंचालन व आभार कार्यक्रमाचे सूत्रसंचालन इयत्ता नववीची विद्यार्थिनी तन्वी पाटील हिने केले, तर सिद्धी पाटील हिने उपस्थितांचे आभार मानले. या कार्यक्रमाला विद्यार्थ्यांनी मोठ्या संख्येने उपस्थित राहून वैज्ञानिक दृष्टिकोन जोपासण्याची आणि मराठी भाषा समृद्ध करण्याची शपथ घेतली.