सातोसे देवी माऊलीचा आजपासून वर्धापन दिन सोहळा

2026-05-14 00:00:00

सामाजिक

बांदा (प्रतिनिधी) - सातोसे येथील श्री देवी माऊली पंचायतन देवस्थानच्यावतीने गुरुवारी १४ व शुक्रवार १५ मे रोजी वर्धापन दिन सोहळ्याचे आयोजन करण्यात आले आहे. या दोन दिवसीय धार्मिक व सांस्कृतिक कार्यक्रमात विविध पूजाविधी, आरत्या, भजने तसेच पारंपरिक दशावतारी नाट्यप्रयोगांचे आयोजन करण्यात आले आहे. गुरुवारी १४ रोजी सकाळी ९ वाजता अभिषेक, दुपारी १२ वाजता महाआरती व तीर्थप्रसाद होणार आहे. सायंकाळी ७.३० वाजता श्री बोर्डेकर पारंपरिक दशावतार नाट्यमंडळ, दोडामार्ग यांचा दशावतारी नाट्यप्रयोग सादर होणार आहे. शुक्रवारी १५ रोजी सकाळी ८ वाजता लघुरुद्र, दुपारी 12 वा. महाआरती व तीर्थप्रसाद, तसेच दुपारी १ ते ३ या वेळेत महाप्रसादाचे आयोजन करण्यात आले आहे. सायंकाळी ४ वा. स्थानिक भजने, ५ वा. महिलांचा फुगडी कार्यक्रम, ७ वा. दिवजोत्सवसह पालखी प्रदक्षिणा होणार आहे. रात्री १० वा. बाळकृष्ण गोरे पारंपरिक लोककला दशावतार नाट्यमंडळ, कवठी-कुडाळ यांचा दणदणीत नाट्यप्रयोग रंगणार आहे. या धार्मिक व सांस्कृतिक सोहळ्यास परिसरातील भाविकांनी मोठ्या संख्येने उपस्थित राहून लाभ घ्यावा, असे आवाहन श्री देवी माऊली देवस्थान स्थानिक सल्लागार उपसमिती, सातोसे ग्रामस्थ व श्री देवी ग्रामोत्कर्ष समिती मुंबईच्यावतीने करण्यात आले आहे.