विजांच्या लखलखाटांत आणि ढगांच्या कडकडाटासह रत्नागिरीत कोसळला परतीचा पाऊस

2025-10-15 00:00:00

टाइम्स स्पेशल

रत्नागिरी (प्रतिनिधी): रत्नागिरी शहरात बुधवारी दुपारनंतर अचानक परतीच्या पावसाने हजेरी लावली. विजांच्या लखलखाटात आणि ढगांच्या गडगडाटात सुरू झालेल्या मुसळधार पावसामुळे शहरातील वातावरण काही क्षणातच बदलले. दिवसभर उन्हाच्या तडाख्यानंतर अचानक आलेल्या या पावसाने नागरिकांना अक्षरशः गाफील पकडले. दीपावलीच्या पार्श्वभूमीवर शहरातील बाजारपेठ सणाच्या तयारीत रंगली होती. रस्त्यांवर आकर्षक कंदील, रंगीबेरंगी पणत्या, सजावटीच्या वस्तू आणि विविध साहित्यांची विक्री सुरू होती. मात्र, दुपारनंतर आलेल्या या अनपेक्षित पावसामुळे अनेक व्यापाऱ्यांचे मोठे आर्थिक नुकसान झाले आहे.

https://ratnagiritimes.in//assets/images/2020/add/2020/sky22.jpg

बाजारपेठेतील अनेक दुकानदारांनी सांगितले की, पावसाच्या झटक्यामुळे त्यांची कागदी कंदील, सजावटीच्या वस्तू आणि रांगोळी साहित्य भिजून गेले. काही ठिकाणी दुकानांत पाणी शिरल्याने वस्तू खराब झाल्या. अचानक सुरू झालेल्या पावसामुळे व्यापाऱ्यांना वस्तू सुरक्षित ठिकाणी हलवण्यासाठी अक्षरशः धावपळ करावी लागली “दिवाळीच्या आधीच असा पाऊस येईल असं वाटलंच नव्हतं. मागच्या काही दिवसांपासून दुकानं सजवून ठेवली होती. पण या पावसाने सगळं बिघडलं,” असं अनेक व्यापाऱ्यांनी सांगितलं. काहींनी प्रशासनाकडून तातडीने पाणी निचरा करण्याची मागणी केली आहे.

टाइम्स स्पेशल

पावसामुळे बाजारपेठेतील गर्दी अचानक कमी झाली. अनेक ग्राहकांनी पावसापासून बचाव करण्यासाठी दुकाने बंद करून घरी परतण्याचा मार्ग धरला. परिणामी, दिवाळीच्या खरेदीचा उत्साह काही काळ मंदावला. शहरातील हवामान खात्याच्या माहितीनुसार, हा परतीचा पाऊस आणखी एक-दोन दिवस अधूनमधून सुरू राहू शकतो. त्यामुळे नागरिकांनी आणि व्यापाऱ्यांनी आवश्यक ती काळजी घेण्याचे आवाहन करण्यात आले आहे.