राजघराण्याच्या सुनबाईंच्या उमेदवारीने प्रचारात आली 'वेगळीच रंगत'

2025-11-29 00:00:00

टाइम्स स्पेशल

सावंतवाडी (प्रतिनिधी) - सावंतवाडी शहर आपली राजधानी बनवून सावंतवाडी राजघराण्याने या सुंदर नगरीचा पाया रचला. त्यानंतर लोकशाही व्यवस्थेतही राजे श्रीमंत शिवरामराजे भोसले आणि राजमाता श्रीमंत पार्वतीदेवी भोसले यांनी आमदार म्हणून कार्यभार सांभाळला. मात्र, आता नगरपरिषद सार्वत्रिक निवडणुकीत प्रथमच राजघराण्याच्या सुनबाई श्रध्दाराजे सावंत भोसले नगराध्यक्ष पदासाठी रिंगणात उतरल्याने सावंतवाडी शहराच्या निवडणुकीत एक वेगळीच रंगत आली आहे.

https://ratnagiritimes.in//assets/images/2020/add/2020/sky22.jpg

भाजपच्या नगराध्यक्ष पदाच्या उमेदवार श्रध्दाराजे भोसले यांनी युवराज लखमराजे भोसले यांच्यासह शेकडो कार्यकर्त्यांना सोबत घेऊन शहराच्या कानाकोपऱ्यात जाऊन प्रचारात सहभाग घेतला आहे. राजघराण्याचे भोसले कुटुंब या निवडणुकीच्या प्रचारात सक्रियपणे उतरले आहे. त्यामुळे गल्लोगल्ली त्यांचे जोरदार स्वागत होताना दिसत आहे. सावंतवाडी नगरपरिषद नगराध्यक्ष पद खुल्या प्रवर्गातील महिला उमेदवारासाठी आरक्षित झाल्यानंतर भाजप पक्षाच्यावतीने नगराध्यक्ष पदाचे उमेदवार म्हणून इच्छुक असल्याचे जाहीर करून श्रध्दाराजे भोसले यांनी प्रचारात आघाडी घेतली आहे. त्या जिथे जातील तिथे त्यांचे औक्षण करून आणि पुष्पगुच्छ देऊन उत्साहाने स्वागत केले जात आहे. यामुळे सावंतवाडी शहरात प्रचारात एक वेगळाच आणि आनंदी अनुभव समोर येत आहे.

टाईम्स स्पेशल

युवराज्ञी श्रध्दाराजे भोसले यांचे हे उत्स्फूर्त स्वागत पाहून भाजपमध्ये मोठा हुरूप आला आहे. व्हिजन असलेला नगराध्यक्ष पदाचा उमेदवार भाजपने दिला असल्याने कार्यकर्त्यांमध्ये आनंदाचे वातावरण आहे. नगराध्यक्ष आणि नगरसेवक पदाचे उमेदवार गल्लोगल्ली फिरत असताना कॉर्नर सभा घेऊन प्रचाराचा धुराळा उडवत आहेत. याशिवाय, श्रीमंत खेम सावंत भोसले, श्रीमंत शुभदादेवी भोसले आणि युवराज लखमराजे भोसले हे देखील प्रचारात सक्रियपणे पहायला मिळत आहेत. श्रीमंत खेम सावंत भोसले आणि श्रीमंत शुभदादेवी भोसले यांनी काही महत्त्वाच्या लोकांच्या गाठीभेटी घेऊन भाजपच्या बाजूने वातावरण निर्मिती केली आहे. यामुळे भाजपने प्रचारात मोठी आघाडी घेतल्याचे चित्र आहे.