दापोलीत महसूल विभागाची चोरटया वाळूची वाहतूक करणार्‍या आणखी एका डंपरवर कारवाई

2025-10-21 00:00:00

टाइम्स स्पेशल

दापोली (वार्ताहर) : दापोली तालुक्यातील देहेण येथील ग्रामस्थांनी काल चोरट्या वाळूची वाहतुंक करणारा एक डम्पर पकडून तो महसूल विभागाच्या ताब्यात दिल्याची बातमी आज वृत्तपत्रात प्रसिद्ध झाल्यावर सुट्टीच्या दिवशीही आज महसूल विभाग सक्रीय झाला व महसूल विभागाच्या पथकाने चोरट्या वाळूची वाहतूक करणारा एक डम्पर पकडून तो तहसीलदार कार्यालयाच्या आवारात आणून उभा केला आहे. काल देहेण येथील ग्रामस्थांनी चोरट्या वाळूची वाहतूक करणारा एक डम्पर पकडून तो महसूल विभागाच्या अधिकाऱ्यांच्या ताब्यात दिला, त्यानंतर काल सायंकाळी उशिरा तो दापोली पोलीस ठाण्याच्या आवारात आणून उभा करून ठेवण्यात आला आहे. मात्र ग्रामस्थानी जेव्हा तो पकडला होता तेव्हा डम्पर मध्ये जेवढी वाळू होती ती पोलीस ठाण्याच्या आवारात ठेवण्यापूर्वी कमी झाली होती. त्यामुळे या चोरीच्या वाळूचीच चोरी झाली कि काय याची चर्चा दापोलीत सुरु आहे.

https://ratnagiritimes.in//assets/images/2020/add/2020/sky22.jpg

या संदर्भात दापोलीच्या तहसीलदार अर्चना बोंबे यांना माहिती दिली असता त्यांनी त्या डंपरच्या हौदयाचे आकारमान पाहून त्यानुसार दंडात्मक कारवाई करण्यात येणार असल्याची माहिती दिली. दरम्यान आज या संदर्भात वृत्तपत्रात वृत्त प्रसिद्ध होताच सुट्टीच्या दिवशीही महसूल विभाग सक्रिय झाला, महसूल विभागाच्या पथकाने चोरट्या वाळूची वाहतूक करणारा एक डम्पर ताब्यात घेवून तो तहसीलदार कार्यालयाच्या आवारात आणून उभा केला आहे. त्यानंतर हे पथक आंजर्ले खाडीकिनारी असलेल्या चोरट्या वाळूच्या प्लॉटवर पोचले मात्र दोन प्लॉट वर सुमारे ९० ब्रास वाळूचा साठा असूनही त्यावर कोणतीही कारवाई न करता हे पथक माघारी आले त्यामुळे वाळू चोरांना नक्की कोणाचा पाठींबा आहे हे जनतेला दिसून आले आहे.