दापोली येथे व्हेल माशाची उलटी जप्त, ४ जणांना अटक

2025-10-19 00:00:00

टाइम्स स्पेशल

दापोली : दापोली येथील सीमाशुल्क (कस्टम्स) विभागाने दापोली बस स्थानकामागे एका कारमधून कोट्यावधी रुपये किंमत असलेली सुमारे ४ किलो ८३३ ग्रॅम व्हेल माशाची उलटी जप्त केली असून या प्रकरणी ४ जणांना अटक केली असून त्यामध्ये एका पोलीस कर्मचार्‍याचाही समावेश असल्याने खळबळ उडाली आहे. याबाबत कस्टम्स विभागाच्या अधिकार्‍यांनी दिलेल्या माहितीनुसार व्हेल माशाच्या उलटीची विक्री करण्यासाठी काही जण आले असल्याची माहिती कस्टम्स विभागाच्या अधिकार्‍यांना मिळाल्यावर त्यांनी संशयित गाडीचा पाठलाग करून ती दापोली बस स्थानकामागे थांबवली, या वाहनाची झडती घेतली असता त्यांना त्या वाहनात व्हेल माशाची उलटी आढळून आली. या कार मध्ये ४ संशयित आढळून आले, त्यांना मुद्देमालासह ताब्यात घेण्यात आले व चौकशीसाठी दापोली येथील कस्टम्स कार्यालयात आणण्यात आले व त्यांचेकडून माहिती घेण्यात आली.

https://ratnagiritimes.in//assets/images/2020/add/2020/sky22.jpg

याप्रकरणी संशयित युवराज मोरे (मुंबई), संजय धोपट(दाभोळ), निलेश साळवी(रत्नागिरी), सिराज शेख (मुंबई) यांचेविरोधात वन्यजीव संरक्षण कायदा १९७२ नुसार गुन्हा दाखल करून त्यांना अटक करण्यात आली. यापैकी संजय धोपट हे दाभोळ सागरी पोलीस ठाण्यात कार्यरत आहेत, त्यामुळे पोलीस कर्मचारीच असा गुन्हा करत असतील तर सामान्यांनी कोणाकडे पाहावे अशी चर्चा सुरु आहे. या कारवाईत सीमाशुल्क विभागाचे अधीक्षक अतुल पोतदार, निरीक्षक प्रतीक अहलावत, रमणिक सिंग, मुख्य हवालदार सुहास विलणकर, करण मेहता, प्रशांत खोब्रागडे, गौरव मौर्‍या, हेमंत वासनिक सहभागी झाले होते. संशयिताना न्यायालयात हजर केले असता त्यांना न्यायालयीन कोठडीत ठेवण्याचे आदेश न्यायालयाने दिले आहेत.