खा. सुनील तटकरे यांच्या उपस्थितीत खेड पंचायत समितीत विकासकामांचा सविस्तर आढावा

2026-01-02 00:00:00

टाइम्स स्पेशल

खेड (प्रतिनिधी) — रायगड लोकसभा मतदारसंघाचे खासदार खा. सुनील तटकरे यांनी खेड पंचायत समिती येथे तालुक्यातील विविध विकासकामांच्या संदर्भात एक महत्त्वपूर्ण आढावा बैठक घेतली. या बैठकीत खेड तालुक्यात सुरू असलेल्या तसेच प्रस्तावित विकासकामांचा सखोल आढावा घेण्यात आला. रस्ते विकास, पाणीपुरवठा योजना, वीज वितरण व्यवस्था तसेच पोयनार धरण पुनर्वसन यांसारख्या अत्यंत महत्त्वाच्या विषयांवर विविध विभागांच्या अधिकाऱ्यांसोबत सविस्तर चर्चा करण्यात आली. बैठकीदरम्यान खा. सुनील तटकरे यांनी रस्त्यांची सद्यस्थिती, पाणीपुरवठ्यातील अडचणी, वीज वितरणातील तक्रारी तसेच पोयनार धरण पुनर्वसनाशी संबंधित प्रलंबित प्रश्नांबाबत अधिकाऱ्यांकडून माहिती घेतली. नागरिकांच्या दैनंदिन जीवनाशी थेट संबंधित असलेल्या या मूलभूत प्रश्नांवर प्रशासनाने अधिक संवेदनशीलतेने काम करावे, असे त्यांनी यावेळी स्पष्ट केले.

https://ratnagiritimes.in//assets/images/2020/add/2020/sky22.jpg

संबंधित विभागांच्या अधिकाऱ्यांना सर्व विकासकामे विहित वेळेत व दर्जेदार पद्धतीने पूर्ण करण्याच्या स्पष्ट सूचना देण्यात आल्या. कोणत्याही कामात दिरंगाई किंवा हलगर्जीपणा सहन केला जाणार नाही, असे सांगत नागरिकांच्या समस्या तातडीने सोडवून त्यांना दिलासा देण्याचे निर्देश खा. तटकरे यांनी दिले. पोयनार धरण पुनर्वसनाच्या संदर्भात बाधित नागरिकांचे पुनर्वसन, त्यांना देण्यात येणाऱ्या सुविधा तसेच प्रलंबित बाबींवर विशेष भर देत योग्य ती कार्यवाही तात्काळ करण्याचे आदेश देण्यात आले. पुनर्वसन प्रक्रिया पारदर्शक, न्याय्य आणि वेळेत पूर्ण होणे गरजेचे असल्याचेही त्यांनी यावेळी नमूद केले. या आढावा बैठकीस विविध विभागांचे अधिकारी, पंचायत समितीचे कर्मचारी तसेच स्थानिक नागरिक उपस्थित होते. तालुक्यातील विकासकामांना गती देण्यासाठी आणि नागरिकांच्या प्रश्नांचे वेळेत निराकरण करण्यासाठी अशा आढावा बैठका उपयुक्त ठरत असल्याची भावना यावेळी व्यक्त करण्यात आली.