खेड नगरपरिषदेत भाजप गटनेतेपदी रहीम सहीबोले यांची एकमताने निवड

2026-01-02 00:00:00

टाइम्स स्पेशल

खेड (प्रतिनिधी) :- खेड नगरपरिषदेतील भारतीय जनता पार्टीच्या नगरसेवकांच्या बैठकीत रहीम युसुफ सहीबोले यांची भाजप गटनेतेपदी एकमताने निवड करण्यात आली. नगरपरिषदेच्या सभागृहात पार पडलेल्या या बैठकीत सर्व नगरसेवकांनी श्री. सहीबोले यांच्या नेतृत्वावर विश्वास व्यक्त करत त्यांना ही जबाबदारी सोपवली. रहीम युसुफ सहीबोले हे गेल्या अनेक वर्षांपासून सामाजिक व राजकीय क्षेत्रात सक्रिय असून शहराच्या विकासासाठी सातत्याने पाठपुरावा, सर्वसामान्य नागरिकांच्या प्रश्नांसाठी केलेली ठाम मांडणी आणि पक्षसंघटन मजबूत करण्यासाठी घेतलेली मेहनत यामुळेच त्यांच्या नावावर सर्वानुमते शिक्कामोर्तब करण्यात आल्याचे यावेळी उपस्थितांनी सांगितले.

https://ratnagiritimes.in//assets/images/2020/add/2020/sky22.jpg

या निवडीनंतर बोलताना श्री. सहीबोले यांनी पक्षातील सर्व सहकाऱ्यांचे आभार मानत खेड शहराच्या सर्वांगीण विकासासाठी, स्वच्छता, पाणीपुरवठा, रस्ते, नागरी सुविधा आणि पारदर्शक प्रशासनासाठी कटिबद्ध राहण्याचा निर्धार व्यक्त केला. तसेच विरोधकांनाही विश्वासात घेऊन नगरपरिषदेत सकारात्मक आणि विकासाभिमुख राजकारण करण्याचे आश्वासन त्यांनी दिले. या निवडीचे स्वागत भाजप कार्यकर्ते, पदाधिकारी आणि समर्थकांनी करत श्री. सहीबोले यांचे अभिनंदन केले. खेड नगरपरिषदेत भाजपची भूमिका अधिक प्रभावीपणे मांडली जाईल आणि शहराच्या विकासाला नवी दिशा मिळेल, असा विश्वास यावेळी व्यक्त करण्यात आला. यावेळी भाजप जिल्हाध्यक्ष सतीश मोरे, भाजपा नेते वैभव खेडेकर, नगरसेविका वैभवी खेडेकर, नगरसेविका स्वप्नाली चव्हाण, राकेश चव्हाण, श्री. देवकाते यांच्यासह भाजपचे पदाधिकारी आणि कार्यकर्ते मोठ्या संख्येने उपस्थित होते.