सावंतवाडी (प्रतिनिधी) : बांदा बाजारपेठेत फुलांचे दुकान लावण्यावरून वारंवार होत असलेल्या अटकावामुळे आलेल्या नैराश्यातून आफताब कमरूद्दीन शेख (वय ३८, रा. बांदा-मुस्लिमवाडी) या तरुणाने बुधवारी पहाटे आपल्या राहत्या घरात गळफास लावून आत्महत्या केली. आत्महत्या करण्यापूर्वी आफताब शेख यांनी एक भावनिक व्हिडिओ बनवला. या व्हिडिओमध्ये त्यांनी आपल्या आत्महत्येला बांदा शहरातील पाच जण जबाबदार असल्याचे स्पष्टपणे म्हटले आहे. व्यवसाय करू न दिल्याने घरची परिस्थिती हलाखीची झाली असून, पत्नी-मुलांचे हाल होत असल्याचे सांगून, 'माझ्या मुलांना सांभाळा' अशी भावनिक साद त्यांनी घातली आहे.
आफताब यांचे बांदा बाजारपेठेत फुलांचे दुकान होते. आठ महिन्यांपूर्वी त्यांनी दुकान लावताना, 'फुलांवर थुंकल्याचा' आरोप करत शहरातील काही तरुणांनी दुकान लावण्यास अटकाव केला होता. यामुळे तब्बल आठ महिने त्यांना व्यवसाय करता आला नाही. जत्रोत्सव हंगाम सुरू झाल्याने त्यांने पुन्हा दुकान सुरू केले, मात्र त्यातील काही लोकांनी पुन्हा व्यवसाय करू देणार नाही, अशी भूमिका घेतल्याने त्यांनी आत्महत्येचा मार्ग स्वीकारला. ही घटना बुधवारी सकाळी साडेपाच वाजण्याच्या सुमारास घडली. गळफास लावल्याचे लक्षात येताच नातेवाईकांनी त्याला तातडीने बांदा येथील ग्रामीण रुग्णालयात दाखल केले. अधिक उपचारासाठी सावंतवाडी रुग्णालयात, त्यानंतर गोवा-बांबुळी येथे नेत असताना त्यांचे निधन झाले.
याप्रकरणी बांदा पोलीस ठाण्यात आकस्मिक मृत्यूची नोंद करण्यात आली आहे. परंतु, आफताबच्या आत्महत्येला जबाबदार असलेल्या पाच जणांना तात्काळ अटक करण्याची मागणी त्यांच्या नातेवाईकांनी केली आहे. "जोपर्यंत संबंधितांना अटक केली जात नाही, तोपर्यंत आम्ही मृतदेह ताब्यात घेणार नाही," असा इशारा नातेवाईकांनी दिला आहे. या पार्श्वभूमीवर सावंतवाडी उपजिल्हा रुग्णालयात मुस्लिम बांधवांनी मोठी गर्दी केली.
3 Comments
Denise Barrett
Lorem ipsum dolor amet consectetur adipisic elit eiusmod tempor incididunt labore dolore magna aliqu enimad min incididunt ut labore et dolore sed.
Jesse Cole
Lorem ipsum dolor amet consectetur adipisic elit eiusmod tempor incidid magna aliqu enimad min incididunt labore dolore sed.
Timothy Tyler
Lorem ipsum dolor amet consectetur adipisic elit eiusmod tempor incididunt labore dolore magna aliqu enimad min incididunt ut labore et dolore sed.