पाकिस्तानचा अफगाणिस्तानवर एअर स्ट्राईक; 400 जणांचा मृत्यू

2026-03-17 00:00:00

टाइम्स स्पेशल

इराण युद्धाच्या पार्श्वभूमीवर भारताच्या शेजारी देशांमध्येही मोठा संघर्ष उफाळला आहे. पाकिस्तानच्या हवाई दलाने अफगाणिस्तानमधील काबूलवर एअरस्ट्राईक केला आहे. पाकिस्तानकडून रहिवाशी परिसर आणि रुग्णालयांना लक्ष्य करून हा हल्ला करण्यात आला. पाकिस्तानी हवाई दलाने केलेल्या बॉम्बचा वर्षावात जवळपास 400 जणांचा मृत्यू झाल्याची माहिती समोर आली आहे. या घटनेचा एक व्हिडिओ समोर आला आहे, ज्यामध्ये काबूलमधील एका व्यसनमुक्ती रुग्णालयावर झालेल्या पाकिस्तानी हवाई हल्ल्यानंतर झालेला एक शक्तिशाली स्फोट दिसत आहे.

https://ratnagiritimes.in//assets/images/2020/add/2020/sky22.jpg

अफगाण तालिबानच्या एका प्रवक्त्याने सांगितले की, पाकिस्तानी हल्ल्यात 400 लोक ठार आणि 250 जखमी झाले असून, हा आतापर्यंत अफगाणिस्तानवरील सर्वात प्राणघातक हल्ला असल्याचे म्हटले जात आहे. अफगाण सरकारचे उपप्रवक्ते हमदुल्ला फितरत यांनी 'एक्स'वरील एका पोस्टमध्ये सांगितले की, स्थानिक वेळेनुसार रात्री 9 वाजण्याच्या सुमारास 2,000 खाटांच्या रुग्णालयावर हा हल्ला झाला. अफगाण सरकारचे प्रवक्ते झबिहुल्ला मुजाहिद यांनी पाकिस्तानवर रुग्णालये आणि नागरी लक्ष्यांना लक्ष्य करणे हा एक अत्याचार असल्याचा आरोप केला. "आम्ही या हल्ल्याचा तीव्र निषेध करतो आणि असे कृत्य सर्वमान्य तत्त्वांच्या विरुद्ध तसेच मानवतेविरुद्धचा गुन्हा मानतो," असे त्यांनी ट्विटरवर पोस्ट केले.