.jpg)
सावंतवाडी (प्रतिनिधी) - चैत्र शुद्ध प्रतिपदा अर्थात गुढीपाडवा आणि हिंदू नववर्षाचे स्वागत करण्यासाठी सावंतवाडी शहरात 'सकल हिंदू समाज हिंदू नववर्ष स्वागत यात्रा समिती'च्या वतीने भव्य 'हिंदू नववर्ष स्वागत यात्रा' उत्साहात काढण्यात आली. पारंपरिक वेशभूषा, ढोल-ताशांचा गजर आणि 'जय श्रीराम'च्या जयघोषाने अवघी सावंतवाडी नगरी भक्तीमय वातावरणात न्हाऊन निघाली होती. या स्वागत यात्रेत शहराचे सांस्कृतिक वैभव पाहायला मिळाले. ढोल-ताशा पथक, लेझिम पथक आणि झांज पथकांच्या तालावर तरुणाईसह आबालवृद्ध थिरकले. यात्रेचे मुख्य आकर्षण असलेले विविध चित्ररथ आणि भव्य रथ पाहण्यासाठी नागरिकांनी रस्त्याच्या दुतर्फा गर्दी केली होती. विशेषतः महिलांचा सहभाग अत्यंत उत्स्फूर्त असून, पारंपरिक नऊवारी साड्या आणि फेटे परिधान केलेल्या महिलांनी यात्रेची शोभा वाढवली.
ही शोभायात्रा स्थानिक राजवाडा येथून उत्साहात सुरू झाली. त्यानंतर नारायण मंदिर, गांधी चौक, जयप्रकाश चौक आणि शिवरामराजे पुतळा मार्गे मार्गक्रमण करत भोसले उद्यान येथे यात्रेचा समारोप झाला. या कार्यक्रमाचे नियोजन संयोजक शैलेश गुरुदास पै आणि सह-संयोजिका गायत्री गुरुदास देवस्थळी यांच्या मार्गदर्शनाखाली करण्यात आले होते. या सोहळ्यात युवराज लखमराजे भोसले, भाजपचे युवा नेते विशाल परब, सामाजिक कार्यकर्त्या वेदीका परब, क्रीडा सभापती सुधीर आडीवरेकर, नगरसेवक अजय गोंदावळे, खजिनदार आनंद साधले, विनायक रांगणेकर, विशाखा रांगणेकर, कस्तुरी देवस्थळी, केतन आजगावकर, हेमंत बांदेकर, दिनेश गावडे यांसह राजकीय, सामाजिक आणि धार्मिक क्षेत्रातील अनेक मान्यवर सहभागी झाले होते.
हिंदू नववर्षाच्या या सोहळ्यात शहरातील अनेक संस्थांनी आपला सहभाग नोंदवला.आरंभ सखी, बजरंग दल, दुर्गावाहिनी, सनातन संस्था आणि विश्व हिंदू परिषद. एकमुखी दत्तमंदिर ट्रस्ट, हरेकृष्ण संस्कार केंद्र, श्री. रामानंद संप्रदाय (नरेंद्र महाराज), आणि वेदपाठशाळा सावंतवाडी. हिंदू वैश्य वाणी संघटना, पाटीदार समाज, महाराष्ट्र ब्राह्मण मंडळ आणि सुवर्णकार संघ. पुर्व सैनिक सेवा परिषद, सिंधुमित्र सेवा सहयोग प्रतिष्ठान आणि गोरक्षक. घे भरारी, रासाई कला क्रीडा मंडळ, रिक्षा संघटना, सालईवाडा मित्रमंडळ, समता महिला मंडळ, शिवकन्यका, शिवप्रतिष्ठान हिन्दुस्तान, विद्याभारती शिशुवाटिका आणि वैश्यवाडा मित्रमंडळ यांचा सहभाग होता. या सर्व संस्थांच्या सहकार्यामुळे आणि नियोजनामुळे ही स्वागत यात्रा निर्विघ्नपणे आणि अत्यंत भव्य स्वरूपात पार पडली. हिंदू संस्कृतीचे जतन आणि नववर्षाचा उत्साह द्विगुणित करण्याच्या उद्देशाने आयोजित या सोहळ्याचे सावंतवाडीकरांनी कौतुक केले आहे.
3 Comments
Denise Barrett
Lorem ipsum dolor amet consectetur adipisic elit eiusmod tempor incididunt labore dolore magna aliqu enimad min incididunt ut labore et dolore sed.
Jesse Cole
Lorem ipsum dolor amet consectetur adipisic elit eiusmod tempor incidid magna aliqu enimad min incididunt labore dolore sed.
Timothy Tyler
Lorem ipsum dolor amet consectetur adipisic elit eiusmod tempor incididunt labore dolore magna aliqu enimad min incididunt ut labore et dolore sed.