जनतेचा कौल असेल तरच बॉक्साईड उत्खनन; उद्योगमंत्री उदय सामंत यांची भूमिका स्पष्ट

2026-04-20 00:00:00

टाइम्स स्पेशल

रत्नागिरी: राजापूर तालुक्यातील सागवे आणि नाणार परिसरात प्रस्तावित असलेल्या बॉक्साईड उत्खननाचा मुद्दा सध्या चांगलाच तापला असताना, राज्याचे उद्योगमंत्री आणि रत्नागिरीचे पालकमंत्री उदय सामंत यांनी आपली भूमिका स्पष्ट केली आहे. "या प्रकल्पाबाबत जी किरण सामंत यांची भूमिका आहे, तीच माझी देखील भूमिका आहे. जनतेच्या इच्छेविना कोणताही प्रकल्प लादला जाणार नाही," असे ठाम प्रतिपादन त्यांनी रत्नागिरीत पत्रकारांशी बोलताना केले. सागवे आणि नाणार येथील बॉक्साईड उत्खनन प्रकल्पावरून स्थानिक पातळीवर मोठा विरोध पाहायला मिळत आहे. या पार्श्वभूमीवर उदय सामंत यांनी स्पष्ट केले की, या प्रकल्पाचा निर्णय मागील सरकारच्या काळात झाला होता. त्यावेळी देखील आपण पालकमंत्री म्हणून हीच भूमिका घेतली होती की, जर जनतेने हा प्रकल्प स्वीकारला तरच तो पुढे नेला जाईल. जनभावना लक्षात घेऊनच त्यावेळी या प्रकल्पाला स्थगिती देण्यात आली होती, याची आठवणही त्यांनी करून दिली.

https://ratnagiritimes.in//assets/images/2020/add/2020/sky22.jpg

उदय सामंत म्हणाले की, "माझे आणि किरण सामंत यांचे या विषयावर सविस्तर बोलणे झाले आहे. त्यांनी जी भूमिका मांडली आहे ती सर्वसामान्य जनतेच्या हिताचीच आहे. पंचायत समितीच्या मासिक सभेतही या प्रकल्पाला कडाडून विरोध करण्यात आला आहे. लोकशाहीत जनतेचा आवाज महत्त्वाचा असतो आणि या विरोधाचा विचार सरकारला नक्कीच करावा लागणार आहे." जनतेच्या विरोधात जाऊन कोणतेही पाऊल उचलणे सरकारला शक्य नसल्याचे त्यांनी यावेळी अधोरेखित केले. भविष्यात या प्रकल्पासंदर्भात होणाऱ्या जनसुनावणीबाबत बोलताना सामंत यांनी आश्वासित केले की, "जे जनतेला हवे आहे, तीच अधिकृत भूमिका जनसुनावणीच्या वेळी समोर ठेवली जाईल." यामुळे प्रशासकीय स्तरावर काहीही हालचाली सुरू असल्या तरी, अंतिम निर्णय हा स्थानिकांच्या संमतीवरच अवलंबून असेल हे आता स्पष्ट झाले आहे. एकूणच, आगामी निवडणुकांच्या पार्श्वभूमीवर आणि कोकणातील वाढता विरोध पाहता, उद्योगमंत्र्यांनी सावध पवित्रा घेत पूर्णपणे जनतेच्या बाजूने उभे राहण्याचे संकेत दिले आहेत. यामुळे सागवे आणि नाणारमधील ग्रामस्थांना मोठा दिलासा मिळण्याची शक्यता आहे.