खेड बाजारपेठेत वाहतुकीला अडथळा ठरणाऱ्या ट्रक चालकावर गुन्हा दाखल

2026-04-14 00:00:00

टाइम्स स्पेशल

खेड: सार्वजनिक रस्त्यावर निष्काळजीपणे वाहन उभे करून वाहतुकीस अडथळा निर्माण केल्याप्रकरणी खेड पोलिसांनी एका ट्रक चालकाविरुद्ध गुन्हा दाखल केला आहे. ही कारवाई सोमवारी, १३ एप्रिल २०२६ रोजी दुपारी करण्यात आली. मिळालेल्या माहितीनुसार, १३ एप्रिल रोजी सकाळी ११:२३ वाजेच्या सुमारास खेड बाजारपेठेतील निवाचा नाका येथील 'जनता कोल्ड्रिंक्स' समोर एक आयशर प्रो ३०१५ ट्रक (क्रमांक: MH-50-N-1172) उभा असल्याचे दिसून आले. हा ट्रक सार्वजनिक रस्त्यावर अशा पद्धतीने उभा करण्यात आला होता की, ज्यामुळे येणाऱ्या-जाणाऱ्या इतर वाहनांना आणि पादचाऱ्यांना मोठा अडथळा निर्माण होत होता.

https://ratnagiritimes.in//assets/images/2020/add/2020/sky22.jpg

रहदारीच्या ठिकाणी वाहन बेजबाबदारपणे उभे असल्याचे निदर्शनास आल्यानंतर पोलीस कर्मचारी तेजस्वीनी उमेश जाधव यांनी याप्रकरणी फिर्याद दिली. याप्रकरणी पोलिसांनी वसंत लक्ष्मण जाधव (वय ४७ वर्षे, रा. मातंगवस्ती, मल्हारपेठ, पाटण, जि. सातारा) याच्याविरुद्ध गुन्हा नोंदवला आहे. खेड पोलीस ठाण्यात दुपारी 2:३० वाजता या घटनेची नोंद करण्यात आली असून, आरोपीविरुद्ध भारतीय न्यायसंहिता २०२३ च्या कलम २८५ (सार्वजनिक मार्गावर अडथळा किंवा धोका निर्माण करणे) नुसार गुन्हा रजिस्टर नंबर ९९/२०२६ अन्वये दाखल करण्यात आला आहे. बाजारपेठेसारख्या गर्दीच्या ठिकाणी वाहतुकीचे नियम धाब्यावर बसवणाऱ्या वाहनचालकांवर पोलिसांकडून आता कडक नजर ठेवली जात आहे.