सी. बी. एस. ई. शालेय डान्स स्पर्धेत रोटरी स्कूलचा संघ द्वितीय

2025-12-04 00:00:00

टाइम्स स्पेशल

खेड (प्रतिनिधी) - कृष्णा सहोदय काॅम्प्लेक्स, सांगलीमार्फत श्री. ए. बी. पाटील इंग्लिश स्कूल, सांगली या ठिकाणी घेण्यात आलेल्या सी. बी. एस. ई. शालेय डान्स स्पर्धेत रोटरी स्कूलच्या विद्यार्थ्यांनी द्वितीय क्रमांक पटकावला. सदरच्या स्पर्धेसाठी अनेक शाळांनी सहभाग घेतला होता. यामध्ये रोटरी स्कूलच्या विद्यार्थ्यांनी आपला सहभाग नोंदविला होता. या स्पर्धेत जगातील विविध डान्स प्रकार सादर करायचे होते. यामध्ये रोटरी स्कूलमधील विद्यार्थ्यांनी श्रीलंकेतील प्रसिध्द शास्त्रीय नृत्यप्रकारातील कांद्यान हे प्रसिध्द नृत्य सादर करून उपस्थित परीक्षक व प्रेक्षकांची मने जिंकत द्वितीय क्रमांकाला गवसणी घातली.

https://ratnagiritimes.in//assets/images/2020/add/2020/sky22.jpg

या नृत्यामध्ये रोटरी स्कूलच्या कु. स्वरा चाळके, कु. श्रावी महाडीक, कु. गुंजन शिवदे, कु. स्वरा सोनावले, कु. जुई नलावडे, कु. अवनी मराठे, कु. विभा पाडलेकर, कु. रेवा पाटणकर यांनी सहभाग घेतला. या सर्व यशस्वी विद्यार्थ्यांना प्रमुख मान्यवरांच्या हस्ते सन्मानचिन्ह व प्रमाणपत्र देऊन गौरविण्यात आले. वरील सर्व विद्यार्थ्यांच्या यशस्वी कामगिरीमुळे त्यांच्यावर सर्वच स्तरांतून कौतुकाचा वर्षाव होत आहे. वरील सर्व यशस्वी विद्यार्थ्यांना नृत्य प्रशिक्षिका सौ. श्वेता चव्हाण व सौ. प्रिया जोशी यांचे मोलाचे मार्गदर्शन लाभले. संस्थेचे चेअरमन बिपीनदादा पाटणे, सर्व पदाधिकारी, शाळेच्या मुख्याध्यापिका सौ. भूमिता पटेल यांनी यशस्वी विद्यार्थ्यांचे अभिनंदन केले.