बीएमसी महापौर सोडत 22 जानेवारीला; नवीन महापौरसंदर्भात आरक्षणची तारीख निश्चित

2026-01-20 00:00:00

टाइम्स स्पेशल

मुंबई: राज्यातील महापालिकांमध्ये पुढील महापौर कोण होणार, याकडे सर्वांचं लक्ष लागलेलं असतानाच यासंदर्भात मोठी अपडेट समोर आली आहे. महापौरपदासाठीच्या आरक्षण सोडतीचा मुहूर्त अखेर ठरला असून 22 जानेवारी रोजी महापौर आरक्षण सोडत जाहीर होणार आहे. राज्यातील 29 महानगरपालिकांसाठी ही आरक्षण सोडत एकाच दिवशी काढली जाणार आहे. महानगरपालिका निवडणुकांचे निकाल जाहीर झाल्यानंतर आता महापौरपदाच्या निवडीची प्रक्रिया सुरू होणार आहे. मात्र, त्याआधी महापौरपद कोणत्या प्रवर्गासाठी आरक्षित राहणार, हे स्पष्ट होणं महत्त्वाचं मानलं जात आहे. महिला, अनुसूचित जाती-जमाती, ओबीसी की खुल्या प्रवर्गासाठी महापौरपद राहणार, याचा फैसला या सोडतीतून होणार आहे.

https://ratnagiritimes.in//assets/images/2020/add/2020/sky22.jpg

महापालिकांमध्ये राजकीय हालचालींना वेग येण्याची शक्यता आहे. अनेक महापालिकांमध्ये एकाच पक्षाला स्पष्ट बहुमत नसल्याने, महापौरपदासाठी जोरदार लॉबिंग, युती-आघाड्यांचे प्रयत्न आणि नगरसेवकांच्या भेटीगाठींना सुरुवात झाली आहे. आरक्षण स्पष्ट झाल्यानंतर संबंधित महापालिकांमध्ये महापौर निवडीची अधिकृत प्रक्रिया सुरू होईल. त्यामुळे 22 जानेवारीला होणारी आरक्षण सोडत राज्याच्या राजकारणाच्या दृष्टीने अत्यंत महत्त्वाची ठरणार आहे.त्यानंतर महापालिकांच्या सत्तासमीकरण ठरणार आहे.