मालवण दांडी किनार्‍यावर दोन गटात तुंबळ हाणामारी

2026-01-17 00:00:00

गुन्हा

मालवण (प्रतिनिधी) - मालवण दांडी किनार्‍यावर पूर्ववैमनस्यातून दोन गटात तुंबळ हाणामारी झाल्याने खळबळ उडाली आहे. दांडेश्वर मंदिर परिसरात घडलेल्या या हाणामारीत बियर बॉटल, लोखंडी रॉड, लाकडी दांडके आणि होडीच्या वल्ह्याचा वापर करण्यात आल्याने दोन्ही गटातील बरेच जण जखमी झाले आहेत. याप्रकरणी पोलीस ठाण्यात दोन्ही गटांनी परस्पर विरोधी तक्रारी दाखल केल्या असून पोलिसांकडून गुन्हे दाखल करण्यात आले आहेत.

https://ratnagiritimes.in//assets/images/2020/add/2020/sky22.jpg

याबाबत फिर्यादी युवराज नितीन तोडणकर (वय १९, रा. वायरी मोरेश्वरवाडी) याने दिलेल्या तक्रारीनुसार ८ जणांवर विविध कलमान्वये गुन्हा दाखल केला आहे. दरम्यान, सुजल संतोष केळुसकर (२१, रा. दांडी अपराधवाडी) यानेही परस्पर विरोधी तक्रार दाखल केली आहे. याबाबत पोलिसांनी दोन्ही गटांविरुद्ध धोकादायक शस्त्रांनी गंभीर दुखापत करणे, बेकायदेशीर जमाव जमवणे आणि दंगल करणे, महिलांचा विनयभंग करणे, धमकी देणे आणि शांतता भंग करणे आणि जिल्हाधिकार्‍यांच्या मनाई आदेशाचे उल्लंघन केल्याप्रकरणी गुन्हे दाखल केले आहेत. या घटनेतील गंभीर जखमी नितीन तोडणकर व राजन कांदळगावकर यांना मालवण मधील प्राथमिक उपचारानंतर जिल्हा रुग्णालयात अधिक उपचारासाठी हलविण्यात आले होते. दांडी किनार्‍यावर पर्यटकांसमोरच घडलेल्या या जबर हाणामारीच्या घटनेमुळे दांडी परिसरात तणावाचे वातावरण आहे. याबाबत मालवण पोलीस अधिक तपास करत आहेत.