केळशी, आतगांव परिसरात वाघोबा पासून संरक्षण करण्यासाठी साजरी झाली वाघबारस

2025-11-08 00:00:00

टाइम्स स्पेशल

केळशी :- दापोली तालुक्यातील केळशी, आतगाव आदी परिसरात पारंपारिक सण, उत्सव शांततेत साजरे करण्यात येतात. पण आपल्या पशुधनाच्या संरक्षणासाठी दिवाळीत साजरा होणारा हा सण म्हणजेच वाघ बारस. हा अनोखा सण पारंपरिक पद्धतीने आजही या गावांमध्ये साजरा केला जातो. गावामध्ये तो वाघदोबाची जत्रा या नावाने ओळखला जातो.मुक्या प्राण्याविषयी महत्त्व आणि यांच्या जीविताच्या संरक्षणाची काळजी घेणारा म्हणूनहा सण ओळखला जातो . या परिसरात मोठ्या उत्साहात हा सण साजरा केला जातो. या परिसरात गावातील वाडीतून सर्व लोक एकत्र येऊन हा सण साजरा करतात. भात, नाचणी आदी पिकाची कापणी झाल्यानंतर पाळीव प्राणी मोकाट सोडले जातात ही गुरे जंगलात मोकाट फिरत असतात जंगलातील हिंस्त्र प्राणी वाघ,बिबट्यापासून प्रसंगी त्यांच्या जीवित धोका निर्माण होतो. या प्राण्यांचे संरक्षण व्हावे यासाठी हा वाघ बारस हा सण दिनांक 7 नोव्हेंबर 2025 रोजी साजरा करण्यात आला. गावातील प्रत्येक वाडी वाडीतून तांदूळ, पैसे गोळा करून जंगलातील आढ छत्री शेतामध्ये एका ठरलेल्या विशिष्ट ठिकाणी रात्री जेवणाच्या कार्यक्रमाचे आयोजन केले जाते. नैवेद्याचा कार्यक्रम सायंकाळी सात वाचल्यापासून सुरू होतो. गावातील लहान थोर पुरुष मंडळी या कार्यक्रमात मोठ्या उत्साहाने सहभागी होतात.