श्रीराम मंदिर ज्येष्ठ नागरिक संघाची शनिवार दि. २२ नोव्हें. रोजी सभा

2025-11-15 00:00:00

टाइम्स स्पेशल

रत्नागिरी - श्रीराम मंदिर ज्येष्ठ नागरिक संघाची सभा शनि. दि. २२ नोव्हें. २०२५ रोजी सायं. ठिक ४ वा. श्रीराम मंदिर सभागृह, श्रीराम आळी, रत्नागिरी येथे आयोजित करण्यात आली असून या सभेला सर्व ज्येष्ठ नागरिक बंधू भगिनींनी आवर्जुन उपस्थित रहावे असे आवाहन करण्यात आले आहे. पावसाळा संपताच श्रीराम मंदिर ज्येष्ठ नागरिक संघाने ज्येष्ठ बंधु भगिनींसाठी विविध कार्यक्रम आयोजित करण्यास प्रारंभ केला आहे. पावसाळ्यात ज्येष्ठ नागरिक बंधू भगिनींना घराबाहेर पडणे जिकीरीचे होते तसेच यावर्षी पावसाळा सतत चालू होता त्यामुळे त्याकाळात कार्यक्रम आयोजित करता आले नाहीत. आता श्रीराम मंदिर ज्येष्ठ नागरिक संघाची सभा शनि. दि. २२ नोव्हें. २०२५ रोजी सायं. ठिक ४ वा. श्रीराम मंदिर सभागृह, श्रीराम आळी, रत्नागिरी येथे आयोजित करण्यात आली आहे. यावेळी विविध नामवंत तज्ज्ञांना मार्गदर्शन करण्यासाठी आमंत्रित करण्यात आल्याचे सांगण्यात आले.

https://ratnagiritimes.in//assets/images/2020/add/2020/sky22.jpg

यावेळी अ.भा. कोकण मराठी साहित्य परिषदेचे अध्यक्ष प्रा. चंद्रमोहन देसाई हे उपस्थित राहून ज्येष्ठ नागरिक बंधू भगिनींना ‘‘आनंदी जीवनाचा मार्ग’’ या विषयावर उद्बोधक मार्गदर्शन करतील. तसेच नामवंत डॉक्टर सचिन पवार हे यावेळी ज्येष्ठ बंधू भगिनींना भेडसावणार्‍या विविध आजारांवर उपयुक्त टीप्स देतील. ज्येष्ठ नागरिकांना वारंवार होणारे आजार व त्यावर घ्यावयाची काळजी या विषयावर ते मार्गदर्शन करतील. तसेच यावेळी ज्येष्ठ नागरिक बंधू भगिनींचे वाढदिवस जाहीररित्या साजरे करण्यात येतील. त्यांचे हातून श्रीराम दरबारात पूजा करण्यात येईल व त्यांना उत्तम आयुरारोग्य लाभावे यासाठी प्रभू श्रीरामाला साकडे घालण्यात येणार आहे. वाढदिवस असणार्‍या ज्येष्ठ मंडळींना यावेळी शुभेच्छापत्रे देण्यात येतील. ज्येष्ठ मंडळींचा वेळ हसत खेळत व्यतित व्हावा अशा प्रकारचा हा कार्यक्रम असेल.

टाईम्स स्पेशल

तरी रत्नागिरी परिसरातील व तालुक्यातील सर्व ज्येष्ठ बंधु भगिनींनी या कार्यक्रमाला आवर्जुन उपस्थित राहून आनंद लुटावा असे आवाहन श्रीराम ज्येष्ठ नागरिक संघाचे अध्यक्ष विनायक हातखंबकर, उपाध्यक्ष रमाकांत पांचाळ, संदीप डोंगरे, नंदकुमार बिर्जे, नित्यानंद दळवी, दिपक राऊत, अशोक आंबवकर व सुनिल नलावडे यांनी केले आहे.