वेत्ये ग्रामपंचायतीचा अभिनव उपक्रम: जुने कपडे द्या, कापडी पिशव्या घ्या!

2025-12-09 00:00:00

टाइम्स स्पेशल

सावंतवाडी (प्रतिनिधी) - प्लास्टिक पिशव्या वापरावर बंदी आणि 'टाकाऊतून टिकाऊ' संकल्पना राबवित वेत्ये ग्रामपंचायतीने 'जुने कपडे द्या आणि कापडी पिशव्या घ्या' हा अभिनव उपक्रम सुरू केला आहे. मुख्यमंत्री समृद्ध पंचायत राज अभियानांतर्गत वेत्ये गावाने १०० टक्के प्लास्टिक पिशव्या वापरावर बंदी घालण्याचा निर्धार केला आहे. या निर्धारानुसार, प्लास्टिक पिशव्यांना प्रभावी पर्याय म्हणून नागरिकांना गावातच कापडी पिशव्या उपलब्ध करून देण्याची एक अनोखी संकल्पना वेत्ये ग्रामपंचायतीमार्फत राबविणेत येत आहे. गावातील बचत गटांच्या माध्यमातून हा उपक्रम मूर्त रूपात येत आहे. गावातील नागरिकांच्या घरात असलेले अनावश्यक टाकाऊ जुने कापड गोळा करून, त्याच कापडांपासून नागरिकांच्या मागणीनुसार कापडी पिशव्या शिवून त्यांना उपलब्ध करून दिल्या जात आहेत.

https://ratnagiritimes.in//assets/images/2020/add/2020/sky22.jpg

यामुळे प्लास्टिक पिशव्यांच्या वापराला प्रभावीपणे निर्बंध येणार आहेत. सर्वात महत्त्वाचे म्हणजे, घरातील अनावश्यक जुन्या कापडांची योग्य आणि विधायक पद्धतीने विल्हेवाट लावण्यासाठी या उपक्रमाची मोठी मदत होणार आहे. वेत्ये ग्रामपंचायतीचे सरपंच गुणाजी गावडे यांनी प्रसिद्धी पत्रकातून ही महत्त्वपूर्ण माहिती दिली. वेत्ये ग्रामसभेने ५० मायक्रॉनपेक्षा कमी जाडीच्या प्लास्टिक पिशव्यांच्या वापरावर पूर्णपणे बंदी घातली आहे. या नियमांचे उल्लंघन करणाऱ्यांवर कठोर दंडात्मक कारवाई करण्याचा निर्णय घेण्यात आला आहे: विक्रेत्यांसाठी दंड: अशा प्लास्टिक पिशव्यांमध्ये माल देणाऱ्या विक्रेत्यांवर ₹५०० दंड आकारला जाईल. तर अशा पिशव्यांचा वापर करणाऱ्या व्यक्तींवर ₹२०० दंड आकारला जाईल.

टाईम्स स्पेशल

प्लास्टिक बंदीच्या या कठोर निर्णयासोबतच, ग्रामस्थांना कापडी पिशव्यांचा पर्याय गावातच उपलब्ध करून देण्याच्या या अभिनव उपक्रमाचे सर्वत्र कौतुक होत आहे. ग्रा. पं. च्या या महत्त्वपूर्ण संकल्पनेला गावाच्या सीआरपी (CRP) याशिका गावडे, श्री कलेश्वर ग्रामसंघ अध्यक्ष संतोषी गावकर, तसेच सचिव सायली गावकर यांनी मूर्त स्वरूप देण्याचे मान्य केले आहे.