कांदळगावचे ग्रामदैवत श्री देव रामेश्‍वर निघाले प्रियजनांच्या भेटीला

2026-01-23 00:00:00

सामाजिक

मालवण (प्रतिनिधी) - शिवकाळापासून चालत आलेल्या रूढी परंपरेचा मानमराबत ठेवत आज सकाळी नऊ वाजता कांदळगावचे ग्रामदैवत श्री देव रामेश्वर आपले पंचायतन आणि हजारोंच्या संख्येने एकत्रित झालेल्या रयतेला घेऊन आपल्या प्रियजनांच्या अर्थात छत्रपती शिवाजी महाराज आणि आदिमाया श्रीदेवी भवानी यांच्या भेटीसाठी निघाले. किल्ले सिंधुदुर्गवर जाण्यासाठी निघालेल्या श्री देव रामेश्वराचे कांदळगाव ते मालवण या दरम्यान अनेक भाविकांनी स्वागत केले. आज सकाळी नऊ वाजण्याच्या सुमारास श्री देव रामेश्वर मंदिरातील गुरवाने खड्या आवाजात पारंपारिक पद्धतीने गार्‍हाणे घातले आणि एका अनामिक आत्मविश्वासाने रयत ही श्री देव रामेश्वर आणि त्याच्या पंचायतनासह मंदिराबाहेर पडली. यावेळी ढोल ताशांचा गजर आणि फटाक्यांची तुफानी आतिषबाजी करण्यात आली. शिवनामाचा जयघोष करत निघालेली श्रीदेव रामेश्वराची पालखी आणि देव देवतांचे तरंग हे कांदळगाव येथून सुमारे तीन तास मालवणच्या दिशेने कूच करीत होते. दुपारी बारा वाजण्याच्या सुमारास कांदळगावच्या रामेश्वराचे आगमन मालवण शहरात झाले. तत्पूर्वी कोळंब येथे मालवण व्यापारी संघाचे अध्यक्ष उमेश नेरुरकर यांनी व्यापार्‍यांसह तसेच नगराध्यक्षा सौ.ममता वराडकर यांनी नगरसेवकांसमवेत श्रीदेव रामेश्वराचे स्वागत केले.

https://ratnagiritimes.in//assets/images/2020/add/2020/sky22.jpg

यावेळी उपनगराध्यक्ष दीपक पाटकर, नगरसेवक महेश कांदळगावकर, सहदेव बापर्डेकर, नगरसेविका पूनम चव्हाण, अश्विनी कांदळकर, मेघा सावंत तसेच परशुराम पाटकर, शिल्पा खोत, यतीन खोत, गणेश नेरकर, परशुराम पाटकर, राजू बिडये, संदेश कोयंडे, गणेश प्रभूलकर, सूर्यकांत फणसेकर, राजन वराडकर, छोटू तारी आदी व इतर उपस्थित होते. यावेळी शिवनामाचा जोरदार गजर करण्यात आला. ढोल ताशांचा गजर आणि त्यातच सनईचा मधुर स्वर, फटाक्यांची आतिषबाजी कांदळगाव ते मालवण या मार्गावर उभारण्यात आलेल्या गुढ्या, तोरणे, स्वागताच्या कमानी आणि हजारो भाविकांनी केलेल्या स्वागताचा स्वीकार करीत श्री देव रामेश्वर मालवण येथे दाखल झाला आहे. सायंकाळी किल्ले सिंधुदुर्गवर छत्रपती शिवाजी महाराज आणि आदिमाया श्री देवी भवानी यांच्या भेटीचा ऐतिहासिक सोहळा रंगणार आहे. या सोहळ्याच्या निमित्ताने मालवणनगरी नटली आहे.