कोकण नगरमध्ये प्रशासनाचा 'बुलडोझर' रोखला

2026-01-23 00:00:00

टाइम्स स्पेशल

रत्नागिरी (प्रतिनिधी) : कोकण नगर येथील मुख्य मार्केटमध्ये नगरपालिका आणि पोलीस प्रशासनाकडून अचानक सुरू करण्यात आलेली धडक कारवाई सामाजिक कार्यकर्ते नौसीन काझी यांच्या यशस्वी हस्तक्षेपामुळे थांबवण्यात आली. प्रशासनाच्या या आक्रमक भूमिकेमुळे व्यापाऱ्यांचे होणारे लाखो रुपयांचे नुकसान टळले असून, सामान सुरक्षित स्थळी हलवण्यासाठी वेळ मिळाल्याने गाळेधारकांनी सुटकेचा निश्वास टाकला आहे. कोकण नगर हा परिसरातील एक गजबजलेला व्यापारपेठेचा भाग आहे. शुक्रवारी सकाळच्या सुमारास नगरपालिका प्रशासन आणि पोलीस दलाचा मोठा फौजफाटा अचानक या मार्केटमध्ये दाखल झाला. जेसीबी लावून कारवाई सुरू झाल्याने व्यापाऱ्यांची मोठी तारांबळ उडाली. प्रशासकीय पथक गाळे पाडण्याच्या भूमिकेवर ठाम होते, ज्यामुळे परिसरात तणावाचे वातावरण निर्माण झाले होते.

https://ratnagiritimes.in//assets/images/2020/add/2020/sky22.jpg

मार्केटमधील गाळ्यांमध्ये इलेक्ट्रॉनिक्स, कपडे आणि इतर जीवनावश्यक वस्तूंचा मोठा साठा होता. अचानक सुरू झालेल्या या कारवाईमुळे आपले महागडे सामान वाचवण्यासाठी दुकानदारांची धावपळ सुरू झाली. "प्रशासन ऐकण्याच्या मनस्थितीत नव्हते, जर त्यावेळी कारवाई थांबली नसती तर आमचे होत्याचे नव्हते झाले असते," अशी भावना एका स्थानिक व्यापाऱ्याने व्यक्त केली. परिस्थिती हाताबाहेर जात असल्याचे पाहून नौसीन काझी यांनी तातडीने घटनास्थळी धाव घेतली. त्यांनी प्रशासकीय अधिकाऱ्यांशी चर्चा करून गाळेधारकांची बाजू मांडली. व्यापाऱ्यांचे सामान अत्यंत महागडे आणि महत्त्वाचे असल्याने ते सुरक्षितपणे हलवण्यासाठी किमान काही वेळ देण्यात यावा, अशी आग्रही विनंती त्यांनी केली. त्यांच्या मध्यस्थीनंतर प्रशासनाने आपली कारवाई तात्पुरती थांबवण्याचा निर्णय घेतला. नौसीन काझी यांच्या वेळेवर केलेल्या हस्तक्षेपामुळे मोठा अनर्थ टळला. गाळेधारकांना आता आपले सामान सुरक्षित स्थळी स्थलांतरित करण्यासाठी पुरेसा वेळ मिळाला आहे. एका कठीण प्रसंगात सामान्यांच्या पाठीशी खंबीरपणे उभे राहिल्याबद्दल संपूर्ण कोकण नगर परिसरातून आणि व्यापारी वर्गातून नौसीन काझी यांचे आभार मानले जात असून त्यांचे कौतुक होत आहे.