काजू उत्पादनात मोठी घट; दर वधारले तरी शेतकरी अडचणीत, सरकारी मदतीची मागणी

2026-04-07 00:00:00

टाइम्स स्पेशल

दापोली (सागर गोवळे) - कोकणातील महत्त्वाचे नगदी पीक असलेल्या काजूच्या उत्पादनात यंदा मोठी घट झाल्याने बागायतदार हवालदिल झाले आहेत. दापोलीसह संपूर्ण कोकण पट्ट्यात निसर्गाच्या लहरीपणामुळे उत्पादनावर प्रतिकूल परिणाम झाला आहे. सद्यस्थितीत बाजारपेठेत काजूला १६० ते १७० रुपये प्रति किलो असा चांगला दर मिळत असला, तरी हातात मालच नसल्याने शेतकऱ्यांचे आर्थिक गणित कोलमडले आहे. उत्पादनातील घटीची मुख्य कारणेहवामानातील बदल लांबलेला पाऊस आणि मोहराच्या काळात आलेले धुके यामुळे काजूची मोठी फुलगळ झाली. रोगराईचा प्रादुर्भाव कीड आणि रोगांच्या वाढत्या प्रभावामुळे फळधारणेवर परिणाम झाला आहे.

https://ratnagiritimes.in//assets/images/2020/add/2020/sky22.jpg

व्यापाऱ्यांची स्थिती एकीकडे बाजारात काजूचा तुटवडा असल्याने व्यापाऱ्यांना पुरेसा माल उपलब्ध होत नाहीये. मालाची कमतरता असल्याने दर तेजीत आहेत, मात्र प्रत्यक्ष शेतकऱ्यांकडे विक्रीसाठी पुरेसा साठा नसल्याने या वाढीव दराचा फायदा त्यांना घेता येत नाहीये. दर वाढले असले तरी उत्पादन ५० टक्क्यांहून अधिक घटले आहे. खर्चही निघणे कठीण झाले असल्याने सरकारने तातडीने पंचनामे करून नुकसान भरपाई द्यावी अशी मागणी त्रस्त शेतकऱ्यांकडून होत आहे. मिळणारा दर हा गेल्या काही वर्षांच्या तुलनेत चांगला असला, तरी उत्पादन घटल्यामुळे शेतकऱ्यांचे नुकसानच होत आहे. आता यावर सरकार काय भूमिका घेते, याकडे सर्व बागायतदारांचे लक्ष लागले आहे.