वाढत्या उन्हाचा वन्यजीवांना तडाखा; पाण्याच्या शोधात गवा रेडे लोकवस्तीत

2026-04-28 00:00:00

टाइम्स स्पेशल

सावंतवाडी (प्रतिनिधी) : एप्रिल महिन्याचा शेवटचा आठवडा सुरू असतानाच निसर्गाचा पारा कमालीचा वाढला आहे. सावंतवाडी परिसरासह संपूर्ण जिल्ह्यात उष्णतेची लाट जाणवू लागली असून, या वाढत्या तापमानाचा फटका केवळ माणसांनाच नाही, तर जंगलातील वन्यजीवांनाही मोठ्या प्रमाणात बसत आहे. जंगलातील पाण्याचे नैसर्गिक स्रोत आटल्याने वन्यप्राणी आता मानवी वस्तीकडे धाव घेऊ लागले आहेत. याच भटकंतीतून आंबोली महामार्गावर एका गवा रेड्याचा अपघाती मृत्यू झाल्याची दुर्दैवी घटना समोर आली आहे.

https://ratnagiritimes.in//assets/images/2020/add/2020/sky22.jpg

गेल्या काही दिवसांपासून तापमानात मोठी वाढ झाल्याने जंगलातील पाणवठे कोरडे पडले आहेत. वन्यजीवांच्या दृष्टीने जंगलात आता ना पाणी उरले आहे, ना पुरेशी अन्न सुरक्षा. परिणामी, तहान भागवण्यासाठी गवा रेडे, बिबट्या, सांबर यांसारखे प्राणी लोकवस्ती असलेल्या भागातील पाणथळ जागांकडे वळत आहेत. विशेषतः गवा रेडे आता कळपाने फिरताना दिसत असून, पाण्यासाठी ते जीव धोक्यात घालून महामार्ग ओलांडत आहेत.

टाईम्स स्पेशल

पाण्याच्या शोधात जंगलाबाहेर पडलेला एक गवा रेडा आंबोली महामार्गावर रस्ता ओलांडत असताना अज्ञात वाहनाने त्याला जोराची धडक दिली. ही धडक इतकी भीषण होती की, गवा रेड्याचा जागीच मृत्यू झाला. या घटनेमुळे वन्यजीव प्रेमींमधून हळहळ व्यक्त होत आहे. महामार्गावर वाहनांचा वेग प्रचंड असल्याने आणि पाण्यासाठी प्राण्यांचे रस्ते ओलांडण्याचे प्रमाण वाढल्याने अशा अपघातांच्या संख्येत वाढ झाली आहे. केवळ गवा रेडेच नव्हे, तर बिबट्या आणि अन्य हिंस्त्र प्राणी देखील आता मानवी वस्तीच्या जवळ असलेल्या पाण्याच्या टाक्या किंवा ओढ्यांकडे आकर्षित होत आहेत. यामुळे ग्रामीण भागात भीतीचे वातावरण पसरले आहे. शेतकरी आणि ग्रामस्थांना रात्रीच्या वेळी बाहेर पडणे कठीण झाले आहे. जंगलातील वन्यप्राण्यांचे स्थलांतर रोखण्यासाठी वनविभागाने जंगलात कृत्रिम पाणवठे तयार करावेत, अशी मागणी आता जोर धरू लागली आहे. जर वन्यजीवांना जंगलातच पाणी उपलब्ध झाले, तर त्यांचा मानवी वस्तीतील वावर कमी होईल आणि अशा प्रकारचे अपघाती मृत्यू टाळता येतील. वाहनचालकांनीही वन्यजीव क्षेत्रातून प्रवास करताना वाहनांचा वेग मर्यादित ठेवावा, असे आवाहन प्रशासनाकडून करण्यात येत आहे.