रत्नागिरीचा सुपुत्र स्वानंद देसाई आता व्यावसायिक रंगभूमीवर

2026-04-09 00:00:00

मनोरंजन

रत्नागिरी: जिद्द आणि सातत्य असेल तर स्वप्नांना गवसणी घालता येते, हे रत्नागिरीच्या स्वानंद देसाई या तरुण कलाकाराने सिद्ध केले आहे. तब्बल १९ वर्षांच्या प्रदीर्घ प्रवासानंतर स्वानंदने व्यावसायिक रंगभूमीवर दिमाखदार पदार्पण केले असून, मराठी रंगभूमीवरील अजरामर नाटक 'तरुण तुर्क म्हातारे अर्क'मध्ये तो 'बंड्या' ही महत्त्वाची भूमिका साकारत आहे. विशेष म्हणजे, ज्या सावरकर नाट्यगृहाच्या रंगभूमीवर स्वानंदने बालपणी पहिले पाऊल ठेवले, त्याच रंगभूमीवर आता तो व्यावसायिक अभिनेता म्हणून प्रेक्षकांसमोर येत आहे.

https://ratnagiritimes.in//assets/images/2020/add/2020/sky22.jpg

स्वानंदचा कलाप्रवास २००७ मध्ये ए. के. देसाई हायस्कूलमध्ये असताना 'अटक मटक पिंटू सटक' या बालनाट्यापासून सुरू झाला. दिग्दर्शक विनायक सावर्डेकर यांच्या मार्गदर्शनाखाली सुरू झालेला हा प्रवास हौशी रंगभूमीवरील विविध प्रयोगांमधून तावून सुलाखून निघाला. गेल्या १९ वर्षांत स्वानंदने केवळ नाटकांतच नव्हे, तर 'तुला पाहते रे', 'जय जय स्वामी समर्थ', 'श्यामची आई', 'एक गाव भुताचा' यांसारख्या लोकप्रिय मालिका आणि चित्रपटांतूनही आपल्या अभिनयाची चुणूक दाखवली आहे. मात्र, व्यावसायिक नाटकाचा भाग होण्याचे त्याचे स्वप्न आता पूर्ण झाले आहे. १९७२ सालापासून मराठी रसिकांच्या मनावर अधिराज्य गाजवणाऱ्या 'तरुण तुर्क म्हातारे अर्क' या नाटकाचे पुनरुज्जीवन दिग्दर्शक राजेश देशपांडे यांनी केले आहे. यापूर्वी अतुल परचुरे, मोहन जोशी यांसारख्या दिग्गज नटांनी गाजवलेल्या या नाटकात आता नव्या संचासह अभिजीत चव्हाण, अतुल तोडणकर, नीता पेंडसे, नयन जाधव, स्वानंद देसाई यांसारखी तगडी फौज प्रेक्षकांचे मनोरंजन करण्यास सज्ज आहे. राजेश देशपांडे हे स्वतः राजापूरचे (रत्नागिरी) सुपुत्र असल्याने, या नाटकाला कोकणी मातीचा एक वेगळाच जिव्हाळा लाभला आहे.

टाइम्स स्पेशल

येत्या ११ एप्रिल रोजी रात्री ९:३० वाजता सावरकर नाट्यगृह, रत्नागिरी येथे या नाटकाचा विशेष प्रयोग रंगणार आहे. आपल्याच शहरातील एका कलाकाराला व्यावसायिक स्तरावर मोठे यश मिळवताना पाहणे ही रत्नागिरीकरांसाठी अभिमानाची गोष्ट आहे. हौशी रंगभूमी ते व्यावसायिक रंगभूमी असा खडतर प्रवास करणाऱ्या स्वानंदने आपल्या यशाचे श्रेय दिग्दर्शक राजेश देशपांडे आणि निर्मात्या 'पंचकन्या' यांना दिले आहे. रत्नागिरीतील नाट्यप्रेमी रसिकांनी या प्रयोगाला मोठ्या संख्येने उपस्थित राहून गृहप्रवेश हाऊसफुल्ल करावा, असे आवाहन स्वानंद आणि त्याच्या टीमने केले आहे. आगामी काळातही चित्रपट आणि मालिकांच्या माध्यमातून प्रेक्षकांच्या भेटीला येण्याचा मानस या गुणी कलाकाराने व्यक्त केला आहे.