छत्रपती संभाजी महाराज आठवण दिनानिमित्त कसब्यात विविध कार्यक्रमांचे आयोजन

2026-01-07 00:00:00

टाइम्स स्पेशल

संगमेश्वर (प्रतिनिधी) - छत्रपती संभाजी महाराजांच्या पदस्पर्शाने पावन झालेल्या संगमेश्वर कसबा येथे त्यागाचे सर्वोच्च प्रतीक असलेले छत्रपती संभाजी महाराज आठवण दिन मंगळवार, ११ मार्च २०२६ रोजी असून त्यानिमित्त विविध कार्यक्रमांचे आयोजन करण्यात येणार असल्याची माहिती आमदार प्रमोद जठार यांनी दिली. धामणी येथे आयोजित पत्रकार परिषदेत ते बोलत होते. यावेळी आमदार जठार म्हणाले की, संगमेश्वर कसबा येथे छत्रपती संभाजी महाराजांचे केवळ पाच नव्हे तर तब्बल शंभर एकर क्षेत्रात भव्य स्मारक उभे राहिले पाहिजे. या स्मारकस्थळी त्यागाचे सर्वोच्च प्रतीक असलेले छत्रपती संभाजी महाराज यांचा भव्यदिव्य असा पुतळा (स्टॅच्यू) उभारण्यात यावा, अशी ठाम भूमिका त्यांनी मांडली.

https://ratnagiritimes.in//assets/images/2020/add/2020/sky22.jpg

११ मार्च रोजी छत्रपती संभाजी महाराज आठवण दिनानिमित्त पोवाडा, सांस्कृतिक कार्यक्रम तसेच विविध उपक्रमांचे आयोजन करण्यात येणार असल्याचेही त्यांनी सांगितले. हे सर्व कार्यक्रम स्थानिक छत्रपती संभाजी महाराज धर्मरक्षक समितीच्या माध्यमातून आयोजित करण्यात येणार आहेत. येत्या दोन दिवसांत शंभर एकर जमिनीसाठी प्राथमिक सर्वेक्षण करण्यात येणार असल्याची माहिती देत, या प्रस्तावित स्मारकात छत्रपती संभाजी महाराज यांची स्टॅच्यू ऑफ सॅक्रिफाइस स्वरूपातील प्रतिमा उभारण्यात येईल. तसेच संभाजी मार्गावर बलिदान देणार्‍या मावळ्यांचाही यामध्ये सन्मानपूर्वक समावेश करण्यात येणार असल्याचे आमदार जठार यांनी स्पष्ट केले. या पत्रकार परिषदेला डॉ. अमित ताठरे, भाजपाचे तालुकाध्यक्ष विनोद म्हस्के, सतीश पटेल, पाष्टे, सुर्वे आदी मान्यवर उपस्थित होते.