महिलेला बांबूने मारहाण; दोघांवर गुन्हा दाखल

2026-01-07 00:00:00

गुन्हा

खेड - खेड तालुक्यातील सुखदर दयाळकरवाडी येथे आपली बदनामी का करता, अशी विचारणा करण्यास गेलेल्या एका ४५ वर्षीय महिलेला दोघांनी मिळून बेदम मारहाण केल्याची घटना समोर आली आहे. याप्रकरणी खेड पोलीस ठाण्यात दोन संशयितांविरुद्ध भारतीय न्यायसंहिता अधिनियमाच्या विविध कलमान्वये गुन्हा दाखल करण्यात आला आहे.

https://ratnagiritimes.in//assets/images/2020/add/2020/sky22.jpg

मिळालेल्या माहितीनुसार, मुंबईतील महिला रविवारी, ५ जानेवारी रोजी सायंकाळी साडेचार वाजेच्या सुमारास सुखदर दयाळकरवाडी येथील आपल्या घरी होत्या. यावेळी संशयित आरोपी दशरथ महादेव सावदेकर हा आपली बदनामी करत असल्याचे समजल्याने ती महिला जाब विचारण्यासाठी गेली होती. त्यावेळी संशयित दशरथ सावदेकर आणि सतीश शांताराम सावदेकर या दोघांनी फिर्यादी महिलेला हाताच्या थापटाने मारहाण करण्यास सुरुवात केली. वादाचे रूपांतर हाणामारीत झाल्याने संशयित दशरथ सावदेकर याने बांबूने फिर्यादीच्या पाठीत जोराने मारून त्यांना दुखापत केली.

टाइम्स स्पेशल

या घटनेदरम्यान दोन्ही संशयितांनी फिर्यादीला अश्लील शिवीगाळ करत जीवे मारण्याची धमकी दिल्याचेही तक्रारीत म्हटले आहे. जखमी झालेल्या महिलेने खेड पोलीस ठाण्यात धाव घेऊन तक्रार दिली. पोलिसांनी या तक्रारीवरून दशरथ सावदेकर आणि सतीश सावडेकर यांच्या विरोधात भारतीय न्यायसंहिता २०२३ च्या कलम ११८(१), ११५(२), ३५२, ३५१ (२) (३) आणि ३ (५) नुसार गुन्हा नोंदवला आहे.