दापोली अतिक्रमण मुक्त करण्याची नगरपंचायतीची तयारी

2026-01-07 00:00:00

सामाजिक

दापोली (वार्ताहर) - दापोली शहर अतिक्रमण मुक्त करण्याचा निर्णय दापोली नगरपंचायत प्रशासनाने घेतला आहे. शहरातील पदपथावर तसेच रस्त्याच्या बाजूला असलेली दुकाने हटविण्यात येणार आहेत. दापोली शहरात मोठ्या प्रमाणात वाढत आलेल्या अतिक्रमणामुळे नागरिकांना पदपथावरून चालता येत नसल्याच्या तक्रारी नगरपंचायत प्रशासनाकडे येत आहेत. नगरपंचायत हद्दीतील रस्त्यावर, गटारावर, फुटपाथवर केलेले अतिक्रमण किंवा अडथळा नोटीस न देता काढून टाकण्याचा अधिकार नगरपंचायत प्रशासनाला आहे. त्यामुळे १२ जानेवारीपर्यंत हे अतिक्रमण काढून घ्यावे अन्यथा त्यानंतर कोणत्याही क्षणी हे अतिक्रमण काढून टाकण्यात येणार येईल. होणार्‍या नुकसानीस नगरपंचायत जबाबदार राहणार नाही, अशा आशयाची नोटीस नगरपंचायतीकडून वृत्तपत्रात देण्यात आली आहे.

https://ratnagiritimes.in//assets/images/2020/add/2020/sky22.jpg

ज्या खोकेधारकांनी न्यायालयातून स्थगिती आदेश मिळविला आहे, त्या खोकेधारकांनी रस्त्यावर, गटारावर, फुटपाथवर वाढीव बांधकाम केलेले असल्यास किंवा दुकानासमोर छप्पर वाढविले असल्यास तेही तत्काळ काढून टाकण्यात यावे, असा इशाराही नगरपंचायत प्रशासनाने दिला आहे. हे अतिक्रमण दूर केल्यास दापोली शहराच्या सुंदरतेत भर पडणार असून पादचार्‍यांनाही चालण्यास अडथळा होणार नसल्याने दापोलीकरांनी समाधान व्यक्त केले आहे.