गुंबद ग्रामपंचायत येथे प्रजासत्ताक दिनाचा जल्लोष

2026-01-27 00:00:00

टाइम्स स्पेशल

रत्नागिरी (प्रतिनिधी) : भारतीय प्रजासत्ताक दिनाच्या ७७ व्या वर्धापन दिनानिमित्त गुंबद ग्रामपंचायत परिसरातील दरिया मस्जिद चौक येथे उत्साहाचे आणि देदिप्यमान वातावरणाचे दर्शन घडले. या प्रसंगी 'न्यू इरा' इंग्लिश स्कूलच्या विद्यार्थ्यांनी सादर केलेल्या चित्तथरारक प्रात्यक्षिकांनी उपस्थितांच्या डोळ्यांचे पारणे फेडले, तर त्यांच्या अंगात देशभक्तीचा नवा संचार केला. सकाळपासूनच परिसरात राष्ट्रभक्तीचे वातावरण होते. ध्वजारोहणानंतर न्यू इरा शाळेच्या विद्यार्थ्यांनी आपल्या प्रत्यक्ष प्रशिक्षणाचे प्रभावी प्रदर्शन करण्यास सुरुवात केली. संचलन असो वा व्यायाम प्रकार, प्रत्येक कृतीमध्ये कमालीची शिस्त आणि एकजूट दिसून येत होती. विद्यार्थ्यांच्या प्रत्येक हालचालीतून त्यांचे कष्ट आणि प्रशिक्षकांचे मार्गदर्शन स्पष्टपणे झळकत होते.

https://ratnagiritimes.in//assets/images/2020/add/2020/sky22.jpg

कार्यक्रमाचे मुख्य आकर्षण ठरले ते विद्यार्थ्यांनी रचलेले मानवी मनोरे. अत्यंत कठीण आणि आव्हानात्मक अशा या प्रकारात विद्यार्थ्यांनी एकमेकांवर दाखवलेला विश्वास आणि जिद्द वाखाणण्याजोगी होती. जेव्हा सर्वोच्च स्थानी असलेल्या विद्यार्थ्याने तिरंगा फडकवला, तेव्हा संपूर्ण दरिया मस्जिद चौक 'भारत माता की जय'च्या घोषणांनी आणि टाळ्यांच्या गजराने दुमदुमून गेला. "मानवी मनोऱ्याचा प्रत्येक स्तर हा विश्वास आणि समर्पणाचे प्रतीक होता. नव्या पिढीमध्ये असलेली ही ऊर्जा देशाच्या उज्वल भविष्याची साक्ष देते," अशा भावना यावेळी उपस्थित नागरिकांनी व्यक्त केल्या.

टाइम्स स्पेशल

केवळ कलागुणच नव्हे, तर या सादरीकरणातून “सेवा, शिस्त आणि देशभक्ती” या त्रिसूत्रीचा संदेश समाजात पोहोचवण्याचे काम विद्यार्थ्यांनी केले. विद्यार्थ्यांच्या चेहऱ्यावरील आत्मविश्वास आणि त्यांचे कौशल्य पाहून पालक आणि ग्रामस्थ भारावून गेले होते. या कार्यक्रमासाठी ग्रामपंचायतीचे पदाधिकारी, शिक्षक, पालक आणि मोठ्या संख्येने ग्रामस्थ उपस्थित होते. न्यू इरा शाळेच्या या उपक्रमाचे सर्वत्र कौतुक होत असून, हा क्षण गुंबदवासीयांच्या स्मरणात दीर्घकाळ राहील यात शंका नाही.