गवाणे नं 1 शाळेच्या शिरपेचात मानाचा तुरा

2026-01-28 00:00:00

शैक्षणिक

केळंबे-लांजा (सिराज नेवरेकर) - गवाणे नं.१ शाळेची विद्यार्थिनी म्हाळसा राकेश दळवी या विद्यार्थिनीला शौर्य पुरस्काराने प्रजासत्ताकदिनी सन्मानित करण्यात आले असून गवाणे शाळेच्या शिरपेचात मानाचा तुरा रोवला गेला आहे. संरक्षण मंत्रालयाच्या सहकार्याने शिक्षण मंत्रालय, भारत सरकार यांचेमार्फत शैक्षणिक वर्ष २०२५-२६ मध्ये वीर गाथा ५.० हा प्रकल्प राबविण्यात आला. वीर गाथा प्रकल्प ५.० विद्यार्थी शौर्य पुरस्कारासाठी जिल्हा परिषद पूर्ण प्राथमिक शाळा गवाणे नं १ शाळेची इयत्ता पाचवीमधील विद्यार्थिनी म्हाळसा राकेश दळवी हिने पृथ्वीराज चौहान या विषयावर कवितालेखन स्पर्धेत सहभाग घेऊन यश मिळविले. त्याबद्दल तिला शौर्य पुरस्कार जाहीर करण्यात आला आहे. जिल्हास्तरावर नियुक्त केलेल्या मूल्यमापन समितीने निवडक सर्वोत्तम विजेत्यांना दि.२६ जानेवारी २०२६ रोजी त्यांच्या पालकांसोबत विशेष अतिथी म्हणून जिल्हा शिक्षण व प्रशिक्षण संस्था, रत्नागिरी या ठिकाणी आमंत्रित करून प्राचार्य निता कांबळे यांच्या हस्ते गौरविण्यात आले. त्याबद्दल तीचे सर्वत्र अभिनंदन होत असुन, तिच्या आई वडिलांचे तसेच तिला मार्गदर्शन करणार्‍या शिक्षिका सौ. मृगया मोरे, वर्गशिक्षिका सौ. शैला पराडकर, मंगेश मोरे, मुख्याध्यापक निंगाप्पा कुंभार यांचेही अभिनंदन केले जात आहे.