मल्टी नॅशनल कंपनीत अनेक महिला व तरुणींचे लैंगिक शोषण, टीम लीडरसह 6 जणांना अटक

2026-04-10 00:00:00

टाइम्स स्पेशल

नाशिक - भोंदूबाबा अशोक खरातमुळे नाशिक चर्चेत असतानाच महिलांच्या लैंगिक शोषणाचा आणखी एक संतापजनक प्रकार नाशिकमधून उघडकीस आला आहे. शहरातील एका बहुराष्ट्रीय कंपनीतील महिला कर्मचाऱ्यांच्या लैंगिक छळाच्या आरोपांप्रकरणी टीम लीडरसह सहा जणांना अटक करण्यात आली आहे. पोलिसांच्या म्हणण्यानुसार, हा छळ गेल्या चार वर्षांपासून सुरू होता.

https://ratnagiritimes.in//assets/images/2020/add/2020/sky22.jpg

आरोपींविरुद्ध लैंगिक छळ आणि धार्मिक भावना दुखावल्याचे एकूण नऊ गुन्हे दाखल करण्यात आले आहेत. एका आरोपीने लग्नाचे खोटे आश्वासन देऊन एका महिला कर्मचाऱ्यासोबत वारंवार शारीरिक संबंध ठेवले. दुसऱ्या एका प्रकरणात, आरोपीने एका महिला कर्मचाऱ्याचा छळ केला आणि तिच्या वैयक्तिक व वैवाहिक जीवनाबद्दल अपमानजनक टिप्पणी केली. एका मल्टिनॅशनल कंपनीच्या कार्यालयात पीडित महिला, तरुणींसह संशयित आरोपी वेगवेगळ्या पदांवर गेल्या अनेक वर्षापासून नोकरी करतात. पीडित व संशयितांमध्ये ओळख आहे. या ओळखीचा गैरफायदा घेत कार्यालयात काम करताना, बळजबरीने संवाद साधून स्त्री मनाला लज्जा उत्पन्न होईल, असे शब्द वापरून, टिप्पण्या करून तर कधी शरीराला जाणूनबुजून स्पर्श करत विनयभंग केल्याचा आरोप फिर्यादीमध्ये केला आहे. आरोपीने तक्रारदाराच्या शारीरिक रूपाबद्दल अश्लील टिप्पणीही केली. इतकेच नव्हे तर, एका पुरुष कर्मचाऱ्याला नमाज अदा करण्यास भाग पाडले गेले आणि त्याच्या धर्माचा अपमान करण्यात आला. पोलिसांनी सांगितले की, जेव्हा तक्रारदाराने या घटनांबद्दल कंपनीच्या मुख्य अधिकाऱ्याकडे वारंवार तोंडी तक्रार केली, तेव्हा त्यांनी कोणतीही कारवाई केली नाही. उलट, त्यांनी आरोपीच्या कृत्यांना प्रोत्साहन दिले.

टाइम्स स्पेशल

पोलिसांनी मंगळवारी पाच आरोपींना अटक केली, तर सहाव्या आरोपीला बुधवारी अटक करण्यात आली. सर्व आरोपींना बुधवारी स्थानिक न्यायालयात हजर करण्यात आले, जिथे त्यांना 10 एप्रिलपर्यंत पोलीस कोठडी सुनावण्यात आली. आरोपींपैकी एक जण आधीच न्यायालयीन कोठडीत आहे. नाशिक पोलीस आयुक्त संदीप कर्णिक यांच्या निर्देशानुसार, गुन्हे शाखेचे एसीपी संदीप मिटके यांच्या नेतृत्वाखाली एक विशेष तपास पथक (एसआयटी) स्थापन करण्यात आले आहे. हे पथक सर्व प्रकरणांचा सखोल तपास करत आहे. पोलिसांनी इतर महिला कर्मचाऱ्यांना आवाहन केले आहे की, जर त्यांना कोणत्याही प्रकारचा लैंगिक छळ किंवा विनयभंगाचा अनुभव आला असेल, तर त्यांनी पुढे यावे. तक्रारदारांनी व्हॉट्सॲपद्वारे संपर्क साधावा, असे आवाहन करण्यात आले आहे.