लांजा कुंभारवाडीत मानवतेचे दर्शन; गटारात अडकलेल्या गायीची सुखरूप सुटका

2026-05-27 00:00:00

टाइम्स स्पेशल

केळंबे-लांजा (सिराज नेवरेकर) -लांजा शहरातील कुंभारवाडी परिसरात महामार्गालगत सुरू असलेल्या रस्त्याच्या कामादरम्यान तयार करण्यात आलेल्या गटारात एक गाय अडकून पडली होती. या घटनेची माहिती मिळताच परिसरातील हिंदू-मुस्लिम बांधवांनी तसेच पोलीस निरीक्षक निळकंठ बगळे यांनी घटनास्थळी दाखल होत गाईला सुखरूप गटारातून बाहेर काढत मानवतेचे दर्शन घडवले.

https://ratnagiritimes.in//assets/images/2020/add/2020/sky22.jpg

याबाबत मिळालेल्या अधिक माहितीनुसार, सोमवारी सायंकाळी साडेसहा वाजण्याच्या सुमारास एक गाय गटारात अडकून पडल्याची घटना कुंभारवाडी येथे घडली होती. त्या गटारातून गाईला स्वतःहून बाहेर पडता येत नव्हते. या घटनेची माहिती मिळताच परिसरात उपस्थित असलेल्या नागरिकांनी तात्काळ घटनास्थळी धाव घेतली व मदतकार्य सुरू केले. यावेळी हिंदू व मुस्लिम बांधवांनी एकोप्याचे दर्शन घडवत मदतीसाठी पुढाकार घेतला. तर याचवेळी लांजा पोलीस ठाणेचे पोलीस निरीक्षक निळकंठ बगळे हे त्या मार्गावरून गस्त करत होते. त्यावेळेस त्यांनीही तत्परता दाखवत नागरिकांसोबत मदतकार्य केले. यानंतर घटनास्थळावरुन सर्वांच्या संयुक्त प्रयत्नातून गाईला सुखरूप गटातरातून बाहेर काढण्यात आले.

टाइम्स स्पेशल

या मदतकार्यात पोलीस निरीक्षक निळकंठ बगळे, राजू तुळसणकर, गौरव तेरवणकर, प्रसाद गुरव, लेझम मुल्ला, आजीम वणू तसेच गाईचे मालक वसंत कुंभार आदींनी सक्रिय सहभाग घेतला. तर गाईला सुरक्षित बाहेर काढल्यानंतर उपस्थित नागरिकांनी मदतकार्याचे कौतुक केले. दरम्यान, या घटनेतून लांजा शहरातील सामाजिक ऐक्य, मानवतेचे दर्शन घडले.