विहित मुदतीत १००% दोषारोप पत्रे सादर करत नोंदवले उल्लेखनीय यश

2026-05-27 00:00:00

टाइम्स स्पेशल

गुहागर : गुन्हेगारांना वेळेत चाप बसवण्यासाठी आणि पीडितांना जलद न्याय मिळवून देण्यासाठी रत्नागिरी जिल्हा पोलीस दलाने एक कौतुकास्पद पाऊल उचलले आहे. १ जानेवारी २०२६ ते १८ मे २०२६ या कालावधीत ज्या गुन्ह्यांची कायदेशीर मुदत पूर्ण झाली होती, अशा सर्वच्या सर्व (१००%) गुन्ह्यांमध्ये रत्नागिरी पोलिसांनी विहित वेळेत न्यायालयात दोषारोप पत्रे (चार्जशीट) सादर करून मोठी यशस्विता मिळवली आहे. पोलीस अधीक्षक नितीन दत्तात्रय बागटे यांनी घेतलेल्या एका विशेष आढावा बैठकीत जिल्हा पोलीस दलाची ही चमकदार कामगिरी समोर आली आहे. पोलीस अधीक्षक कार्यालयाकडून मिळालेल्या माहितीनुसार, या आढाव्यामध्ये प्रामुख्याने दोन गटांतील गुन्ह्यांचा तपास आणि त्यांच्या दोषारोप पत्रांचा समावेश करण्यात आला होता.

https://ratnagiritimes.in//assets/images/2020/add/2020/sky22.jpg

१० वर्षांपेक्षा कमी शिक्षेचे गुन्हे : या प्रकारच्या गुन्ह्यांमध्ये न्यायालयात दोषारोप पत्र सादर करण्यासाठी ६० दिवसांची मुदत असते. या कालावधीत एकूण ७८० गुन्ह्यांची नोंद झाली होती. त्यापैकी ३२७ गुन्ह्यांमध्ये वेळेत दोषारोप पत्रे सादर करण्यात आली आहेत. उर्वरित ३२४ गुन्हे अद्याप तपासाधीन असून, त्यांची ६० दिवसांची कायदेशीर मुदत अजून संपलेली नाही. १० वर्षांपेक्षा अधिक शिक्षेचे गुन्हे: गंभीर स्वरूपाच्या या गुन्ह्यांमध्ये ९० दिवसांच्या आत दोषारोप पत्र सादर करणे बंधनकारक असते. अशा एकूण ४८ गुन्ह्यांची नोंद झाली होती, ज्यापैकी २५ गुन्ह्यांची चार्जशीट न्यायालयात दाखल झाली आहे. उर्वरित २४ गुन्ह्यांचा तपास सुरू असून त्यांची ९० दिवसांची मुदत अद्याप शिल्लक आहे.

टाईम्स स्पेशल

”रत्नागिरी जिल्हा पोलीस दलाने अत्यंत काटेकोरपणे, वेळेत आणि आपापसात उत्तम समन्वय ठेवून हा तपास पूर्ण केला आहे. ज्या गुन्ह्यांची कायदेशीर मुदत पूर्ण झाली होती, त्या सर्व गुन्ह्यांमध्ये आम्ही १००% दोषारोप पत्रे दाखल करण्यात यशस्वी झालो आहोत. भविष्यातही गुन्हे तपासाची गुणवत्ता आणि पोलिसांची कार्यक्षमता आणखी वाढवण्यासाठी रत्नागिरी पोलीस कटिबद्ध आहेत.”- पोलीस अधीक्षक कार्यालय, रत्नागिरी. पोलिसांच्या या अत्यंत नियोजनबद्ध आणि प्रभावी कामगिरीमुळे गुन्हेगारी प्रवृत्तीला वेसण बसेल, यात शंका नाही. रत्नागिरी पोलिसांच्या या कामगिरीचे सर्वच स्तरांतून कौतुक होत आहे.