संगमेश्वरात लाखो रुपयांचा प्रतिबंधित गुटखा जप्त

2026-05-28 00:00:00

टाइम्स स्पेशल

संगमेश्वर (प्रतिनिधी) - संगमेश्वर पोलिसांनी मोठी कारवाई करत प्रतिबंधित गुटखा व सुगंधित तंबाखू पदार्थांचा साठा जप्त केला असून या प्रकरणी अज्ञात आरोपीविरोधात गुन्हा दाखल करण्यात आला आहे. ही कारवाई पारेख पेट्रोलपंपासमोर रस्त्याच्या साईडपट्टीवर करण्यात आली. पोलीसांनी दिलेल्या माहितीनुसार, एमएच-१४/बीके/४१२० क्रमांकाची सुझुकी कंपनीची वॅगनआर कार संशयास्पद अवस्थेत उभी असल्याची माहिती मिळाल्यानंतर पोलिसांनी तपास सुरू केला. वाहनात मोठ्या प्रमाणावर शासनाने प्रतिबंधित केलेला गुटखा व सुगंधित तंबाखू पदार्थ आढळून आले. दरम्यान, गाडीमध्ये तांत्रिक बिघाड झाल्यानंतर संशयित चालकाने वाहन लॉक करून घटनास्थळावरून पलायन केल्याचे प्राथमिक तपासात समोर आले आहे.

https://ratnagiritimes.in//assets/images/2020/add/2020/sky22.jpg

या कारवाईत विमल पान मसाला, विविध प्रकारची सुगंधित तंबाखू तसेच प्रिमियम आरएमडी पान मसाला असा एकूण सुमारे रु. ५ लाख ४६ हजार ६०० किमतीचा मुद्देमाल जप्त करण्यात आला. तसेच संबंधित वॅगनआर कारही पोलिसांनी ताब्यात घेतली आहे. या प्रकरणी संगमेश्वर पोलीस ठाण्यात गुन्हा रजि. नं. ६०/२०२६ अन्वये बीएनएस कलम १२३, २२३, २७४, २७५ तसेच भादंवि कलम ३२८, १८८, २७२, २७३ आणि अन्न सुरक्षा व मानके कायदा २००६ अंतर्गत विविध कलमान्वये गुन्हा दाखल करण्यात आला आहे. फिर्याद पोलीस कॉन्स्टेबल कृणाल चिंतामणी घोलप यांनी दिली असून अन्न व औषध प्रशासन विभागाच्या अधिकाऱ्यांनी घटनास्थळी येऊन संशयित मालाची तपासणी केल्यानंतर गुन्हा नोंदविण्यात आला. या प्रकरणाचा पुढील तपास पोउनि प्रविण देसाई हे करीत आहेत.