वृषाली रेडकर-येळावीकर यांना 'कोकण रत्न सन्मान २०२६' प्रदान

2026-05-04 00:00:00

टाइम्स स्पेशल

सावंतवाडी (प्रतिनिधी) : सोशल मीडियावर 'कोकणची वृषाली' म्हणून घराघरात पोहोचलेल्या प्रसिद्ध कलावंत वृषाली सुधाकर रेडकर - येळावीकर यांना यावर्षीचा मानाचा 'कोकण रत्न सन्मान २०२६' देऊन गौरविण्यात आले. विश्राम ठाकर आदिवासी कला आंगण चॅरिटेबल ट्रस्ट, सिंधुदुर्ग या संस्थेच्या २० व्या वर्धापन दिनानिमित्त आयोजित 'कला आंगण महोत्सव २०२६' मध्ये हा दिमाखदार सोहळा पार पडला. सिंधुदुर्ग जिल्ह्याच्या जिल्हाधिकारी तृप्ती धोडमिसे आणि संस्थेचे संस्थापक अध्यक्ष, पद्मश्री परशुराम गंगावणे यांच्या शुभहस्ते वृषाली रेडकर यांना हा पुरस्कार प्रदान करण्यात आला. यावेळी व्यासपीठावर चेतन गंगावणे तसेच संस्थेचे पदाधिकारी आणि इतर मान्यवर मोठ्या संख्येने उपस्थित होते.

https://ratnagiritimes.in//assets/images/2020/add/2020/sky22.jpg

वृषाली रेडकर यांनी आपल्या नाविन्यपूर्ण योगदानातून कोकणची समृद्ध संस्कृती, कला आणि परंपरांचे संवर्धन व उन्नती करण्यासाठी मोठे कार्य केले आहे. सोशल मीडियाच्या माध्यमातून त्यांनी कोकणचे सौंदर्य आणि वैभव जगभर पोहोचवले आहे. त्यांच्या अथक परिश्रमांची, समाजहितैषी कार्याची आणि नवदृष्टिकोनाची दखल घेऊनच हा सन्मान प्रदान करण्यात आला. पुरस्कार प्रदान करताना पद्मश्री परशुराम गंगावणे म्हणाले की, "वृषाली रेडकर यांनी आपल्या कार्यातून कोकणच्या वैभवात मौल्यवान भर टाकली आहे. त्यांच्यासारख्या तरुण पिढीमुळेच आपली संस्कृती आणि कला टिकून आहे."

टाइम्स स्पेशल

रविवार ३ मे २०२६ रोजी पिंगुळी येथील 'विश्राम ठाकर आदिवासी कला आंगण म्युझियम' येथे हा सोहळा पार पडला. या महोत्सवात सकाळी ठाकर समाजाचा वधू-वर सूचक मेळावा, सायंकाळी मान्यवरांच्या हस्ते उद्घाटन आणि त्यानंतर कै. शरद गरुड स्मृती कला पुरस्कारांचे वितरण करण्यात आले. रात्री ठाकर लोककलेचे सादरीकरण आणि पिंगुळी येथील 'ओंकार दशावतार नाट्य मंडळा'चा 'सुवर्णमणी प्राप्ती' हा पौराणिक नाट्यप्रयोग सादर झाला. हा सोहळा यशस्वी करण्यासाठी चेतन गंगावणे आणि संस्थेच्या सर्व कार्यकर्त्यांनी विशेष परिश्रम घेतले. या कार्यक्रमाला जिल्ह्यातील नागरिक आणि कलाप्रेमी मोठ्या संख्येने उपस्थित होते.