रत्नागिरीच्या डॉ. पूर्वप्रभा पाटील करणार न्यूयॉर्कमध्ये भारताचे प्रतिनिधित्व

2026-05-04 00:00:00

टाइम्स स्पेशल

रत्नागिरी - डॉ. पूर्वप्रभा पाटील या रत्नागिरीतील प्रख्यात नेत्रतज्ज्ञ डॉ. राधाराणी पाटील यांच्या कन्या असून, रत्नागिरी विधानसभा मतदारसंघातून 2024 मध्ये अपक्ष उमेदवार म्हणून निवडणूक लढवलेले श्री ज्योतिप्रभा पाटील यांच्या धाकट्या भगिनी आहेत. जागतिक आरोग्य क्षेत्रातील आघाडीच्या नेतृत्वांपैकी एक म्हणून त्यांनी मेडिकल स्टुडंट्स असोसिएशन ऑफ इंडिया च्या राष्ट्रीय अध्यक्षा म्हणून काम पाहिले असून देशभरातील 20,000 हून अधिक वैद्यकीय विद्यार्थ्यांचे प्रतिनिधित्व केले आहे. त्यांनी जागतिक आरोग्य संघटना (WHO) संबंधित व्यासपीठांवरही सहभाग नोंदवून जागतिक आरोग्य विषयांवर प्रभावी भूमिका मांडली आहे.

https://ratnagiritimes.in//assets/images/2020/add/2020/sky22.jpg

अलीकडेच त्यांनी संयुक्त राष्ट्रांच्या आर्थिक व सामाजिक परिषद (ECOSOC) युवा मंच 2026 मध्ये भारताचे प्रतिनिधित्व केले. हा प्रतिष्ठित मंच 14 ते 16 एप्रिल दरम्यान न्यूयॉर्क येथील संयुक्त राष्ट्र मुख्यालयात आयोजित करण्यात आला होता. मुलं व युवा यांचा प्रमुख गटाच्या प्रतिनिधी म्हणून त्यांनी विविध देशांतील धोरणकर्ते, संयुक्त राष्ट्रांचे अधिकारी आणि युवा नेते यांच्यासोबत संवाद साधत शाश्वत विकासाशी संबंधित महत्त्वाच्या विषयांवर चर्चा केली. या मंचावर त्यांनी डिजिटल हेल्थकेअर या विषयावर विचार मांडत तंत्रज्ञानाच्या साहाय्याने आरोग्यसेवा अधिक सुलभ, परवडणारी आणि प्रभावी कशी करता येईल यावर भर दिला, विशेषतः भारतासारख्या विकसनशील देशांच्या संदर्भात. डॉ. पूर्वप्रभा पाटील यांचा हा सहभाग रत्नागिरी व कोकणासाठी अभिमानाची बाब ठरला असून जागतिक पातळीवर भारतीय युवा नेतृत्वाची ठळक छाप अधोरेखित करतो.