नवी उमेद, नवे चैतन्य: लोकमान्य टिळक विद्यामंदिरात प्रवेशोत्सव उत्साहात

2026-06-15 00:00:00

टाइम्स स्पेशल

चिखलगाव: (सागर गोवळे) लोकसाधना संचालित 'लोकमान्य टिळक विद्यामंदिर व ज्युनिअर कॉलेज'मध्ये नवीन शैक्षणिक वर्षाची सुरुवात अतिशय उत्साही आणि मंगलमय वातावरणात झाली. विद्यार्थ्यांचा उत्साह आणि पालकांचा सहभाग यामुळे विद्यालयाचा परिसर चैतन्याने न्हाऊन निघाला होता. कार्यक्रमाचे प्रमुख पाहुणे आणि संस्थेचे अध्यक्ष कैवल्य दांडेकर यांच्या हस्ते दीपप्रज्वलन करून नवीन शैक्षणिक वर्षाचा औपचारिक शुभारंभ करण्यात आला. अध्यक्ष दांडेकर यांनी आपल्या मनोगतातून, "केवळ पुस्तकी ज्ञान न देता विद्यार्थ्यांना शिस्त, कौशल्य विकास आणि सर्वांगीण प्रगतीकडे नेणे हेच आमचे उद्दिष्ट आहे," असा ठाम विश्वास व्यक्त केला.

https://ratnagiritimes.in//assets/images/2020/add/2020/sky22.jpg

प्रवेशोत्सवाच्या निमित्ताने नव्याने प्रवेश घेतलेल्या विद्यार्थ्यांचे विशेष 'वेलकम किट' देऊन स्वागत करण्यात आले. यावेळी सर्व विद्यार्थ्यांना पाठ्यपुस्तकांचे वाटप करण्यात आले. नव्या शैक्षणिक प्रवासाला सुरुवात करणाऱ्या विद्यार्थ्यांच्या चेहऱ्यावरील आनंद ओसंडून वाहत होता. शाळा आणि पालक यांच्यातील संवाद अधिक दृढ करण्याच्या उद्देशाने, विविध प्रशासकीय बाबींवर मार्गदर्शन सत्र आयोजित करण्यात आले होते. यात प्रामुख्याने: शाळा व हॉस्टेल प्रवेश प्रक्रिया. आवश्यक कागदपत्रांची पूर्तता. गणवेश मोजमाप व शैक्षणिक साहित्य वाटप. यावर सविस्तर चर्चा करून पालकांच्या शंकांचे निरसन करण्यात आले.

टाईम्स स्पेशल

शिक्षण विभाग प्रमुख धनश्री दांडेकर यांनी शाळेच्या शैक्षणिक उपक्रमांची माहिती दिली, तर कौशल्य विभाग प्रमुख शैलेश खुळे यांनी विद्यार्थ्यांच्या सर्वांगीण कौशल्य विकासासाठी राबविल्या जाणाऱ्या विविध उपक्रमांची रूपरेषा उपस्थितांसमोर मांडली. यावेळी प्राथमिक विभागाचे मुख्याध्यापक नाचणेकर, शिक्षकवृंद, कर्मचारी आणि पालकांची मोठी उपस्थिती होती. सकारात्मक ऊर्जेने भरलेला हा 'प्रवेशोत्सव २०२६' विद्यार्थी-केंद्रित दृष्टीकोनासह यशस्वीरित्या संपन्न झाला.