पहिल्याच रविवारी 'मिनी महाबळेश्वर' आंबोली पर्यटकांनी गजबजली!

2026-07-06 00:00:00

टाइम्स स्पेशल

सावंतवाडी (प्रतिनिधी) : गेल्या आठवड्याभरापासून कोसळणाऱ्या मुसळधार पावसामुळे दक्षिण कोकणाचे नंदनवन मानल्या जाणाऱ्या आंबोली घाटाने हिरवी शाल पांघरली आहे. येथील विहंगम धबधबे आता पूर्ण ताकदीने ओसंडून वाहू लागले आहेत. वर्षापर्यटनासाठी प्रसिद्ध असलेल्या या सह्याद्रीच्या पर्वतरांगांमधील जलप्रपात प्रवाहित झाल्याची बातमी पसरताच, हंगामाच्या पहिल्याच रविवारी पर्यटकांनी आंबोलीकडे धाव घेतली. सिंधुदुर्ग जिल्ह्यासह शेजारच्या गोवा आणि कर्नाटक राज्यातील पर्यटकांचा महापूर आल्याने अवघा घाट रस्ता उत्साहाने दुमदुमून गेला होता. उंच कड्यांवरून दुधासारखे पांढरे शुभ्र रूप घेऊन कोसळणाऱ्या पाण्याचे तुषार अंगावर झेलण्यासाठी पर्यटकांची मोठी चुरस पाहायला मिळाली. मुख्य धबधब्याखाली निसर्गाच्या या देखण्या रूपाचा आनंद लुटण्यात महिला आणि लहान मुलेही आघाडीवर होती.

https://ratnagiritimes.in//assets/images/2020/add/2020/sky22.jpg

हे सुंदर क्षण कॅमेऱ्यात कैद करण्यासाठी तरुण-तरुणींमध्ये फोटो, व्हिडिओ आणि सोशल मीडिया रिल्स बनवण्याची जणू स्पर्धाच लागली होती. मुख्य धबधब्यासोबतच कावळे साद पॉईंट आणि घाटातील इतर लहान-मोठ्या जलप्रपातांवर पर्यटकांनी गर्दी केली होती. तर काही कुटुंबांनी गर्दी टाळण्यासाठी चौकुळ, महादेवगड या अंतर्गत भागातील शांत धबधब्यांचा आसरा घेत आपला वीकेंड साजरा केला. निसर्गाचा हा सोहळा एका बाजूला डोळ्यांचे पारणे फेडत असताना, दुसरीकडे मात्र वाहनांच्या अथांग गर्दीमुळे आंबोली घाटात मोठी वाहतूक कोंडी निर्माण झाली. प्रशासनाने घाटाच्या वरच्या भागात पार्किंगची स्वतंत्र व्यवस्था केली असूनही, काही अतिउत्साही पर्यटकांनी गाड्या रस्त्याच्या कडेला लावल्याने वाहतूक व्यवस्था कोलमडली. सावंतवाडी पोलिसांनी परिस्थिती नियंत्रणात आणण्यासाठी अतिरिक्त बंदोबस्त तैनात केला होता, तरीही वाहनांच्या लांबच लांब रांगांमुळे पोलिसांची मोठी दमछाक झाली.

टाईम्स स्पेशल

निसर्गाच्या या अद्भुत रूपाला रविवारी दाट धुक्याची जोड मिळाली होती. संपूर्ण दरी आणि घाट रस्ता धुक्याच्या पांढऱ्या चादरीत वेढला गेल्याने समोरील वाहन दिसणेही कठीण झाले होते. या गारठ्यात चिंब भिजत गरमागरम चहा, वाफाळलेला वडापाव, भजी आणि मक्याच्या कणसांचा आस्वाद घेताना पर्यटक दिसत होते. तर खवय्यांनी हॉटेलमध्ये कोकणी पद्धतीच्या चवदार मांसाहारी जेवणावर ताव मारण्यास पसंती दिली. धुक्याची दुलई, कोसळणारे धबधबे आणि पर्यटकांचा अलोट उत्साह यांमुळे वर्षभराच्या प्रतीक्षेनंतर आंबोली घाट पुन्हा एकदा पूर्ण वैभवाने बहरला आहे.