स्वच्छता कर्मचाऱ्यांसाठी एकदिवसीय सहल; रोजच्या कष्टातून मिळाला आनंदाचा विरंगुळा

2026-07-12 00:00:00

टाइम्स स्पेशल

मालवण, दि (प्रतिनिधी) : मालवण शहराच्या आरोग्य आणि स्वच्छतेची धुरा अहोरात्र सांभाळणाऱ्या मालवण नगरपरिषदेच्या स्वच्छता कर्मचाऱ्यांसाठी विशेष एकदिवसीय सहलीचे आयोजन करण्यात आले. आरोग्य व स्वच्छता विभागाच्या सभापती पूनम चव्हाण यांच्या संकल्पनेतून आणि मार्गदर्शनाखाली राबविण्यात आलेल्या या उपक्रमामुळे कर्मचाऱ्यांना रोजच्या धावपळीच्या आणि कष्टाच्या कामातून आनंदाचा विरंगुळा मिळाला.

https://ratnagiritimes.in//assets/images/2020/add/2020/sky22.jpg

शहर स्वच्छ आणि सुंदर ठेवण्यासाठी स्वच्छता कर्मचारी सातत्याने मेहनत घेत असतात. त्यांच्या दैनंदिन कामाचा ताण काही काळ बाजूला ठेवून त्यांना आनंदाचे क्षण अनुभवता यावेत, तसेच त्यांचे मनोधैर्य आणि संघभावना अधिक बळकट व्हावी, या उद्देशाने या सहलीचे आयोजन करण्यात आले होते.या एकदिवसीय सहलीत नगरपरिषदेच्या स्वच्छता कर्मचाऱ्यांनी उत्स्फूर्त सहभाग घेतला. विविध मनोरंजक खेळ, अनौपचारिक गप्पागोष्टी आणि आनंदी वातावरणात कर्मचाऱ्यांनी सहलीचा मनमुराद आनंद लुटला. रोजच्या कामाच्या व्यापातून मिळालेल्या या विरंगुळ्यामुळे कर्मचाऱ्यांमध्ये उत्साहाचे वातावरण निर्माण झाले.अशा उपक्रमांमुळे कर्मचाऱ्यांमधील आपुलकी आणि परस्पर संवाद वाढून संघभावना अधिक दृढ होते. त्याचा सकारात्मक परिणाम दैनंदिन कामकाजावरही दिसून येतो. त्यामुळे ही सहल कर्मचाऱ्यांना नव्या उत्साहाने काम करण्यासाठी प्रेरणादायी ठरणार असल्याचे आरोग्य व स्वच्छता विभागाच्या वतीने सांगण्यात आले.

टाइम्स स्पेशल

शहर स्वच्छ ठेवण्यात स्वच्छता कर्मचाऱ्यांचे योगदान अत्यंत महत्त्वाचे आहे. त्यांच्या कष्टाचा सन्मान राखत त्यांना कामातून काही काळ विरंगुळा मिळावा आणि नव्या ऊर्जेने पुन्हा कामाला लागता यावे, यासाठी या सहलीचे आयोजन करण्यात आल्याचेही विभागाने स्पष्ट केले. नगरपरिषद प्रशासन आणि सभापती पूनम चव्हाण यांच्या वतीने सहलीत सहभागी सर्व स्वच्छता कर्मचाऱ्यांचे कौतुक करून त्यांना पुढील वाटचालीस शुभेच्छा देण्यात आल्या. या आनंददायी आणि प्रेरणादायी उपक्रमाबद्दल स्वच्छता कर्मचाऱ्यांनी नगरपरिषद प्रशासनासह सभापती पूनम चव्हाण यांचे विशेष आभार मानले.