पालकमंत्री उदय सामंत सहकार क्षेत्रात; जिल्हा बँक संचालकपदाची निवडणूक लढवणार

2026-09-27 00:00:00

टाइम्स स्पेशल

रत्नागिरी : नेहमी राजकीय घडामोडींच्या केंद्रस्थानी असणारे रत्नागिरी जिल्ह्याचे पालकमंत्री उदय सामंत आता थेट सहकार क्षेत्रात प्रवेश करणार आहेत. आगामी रत्नागिरी जिल्हा मध्यवर्ती सहकारी बँकेच्या (जिल्हा बँक) निवडणुकीत आपण उतरणार असून, संचालक होण्यासाठी रत्नागिरी तालुका प्राथमिक शेती पुरवठा विविध कार्यकारी संस्था मतदारसंघातून उमेदवारी अर्ज दाखल करणार असल्याची मोठी आणि स्पष्ट घोषणा त्यांनी केली आहे. पालकमंत्र्यांच्या या निर्णयामुळे जिल्ह्याच्या राजकीय आणि सहकार वर्तुळात जोरदार चर्चा सुरू झाली आहे.

https://ratnagiritimes.in//assets/images/2020/add/2020/sky22.jpg

उदय सामंत यांनी अगदी सरळ आणि स्पष्ट शब्दांत आपली भूमिका मांडत जिल्हा बँकेच्या निवडणुकीवर लक्ष केंद्रित केले आहे. आतापर्यंत राजकीय व्यासपीठ आणि विकासकामांच्या माध्यमातून जिल्ह्यावर पकड मजबूत ठेवल्यानंतर, आता सहकार क्षेत्रातील सत्ताकारणातही आपले वर्चस्व सिद्ध करण्यासाठी सामंत सज्ज झाले आहेत. शेती संस्था मतदारसंघातून ते स्वतः निवडणूक लढवणार असल्याने या मतदारसंघातील लढत अत्यंत महत्त्वाची आणि प्रतिष्ठेची ठरणार आहे.

टाईम्स स्पेशल

जिल्हा बँकेच्या निवडणुका जाहीर होताच राजकीय हालचालींना प्रचंड वेग आला आहे. त्यातच थेट पालकमंत्र्यांनीच सहकार क्षेत्रात उतरण्याची घोषणा केल्यामुळे विरोधी गटांची रणनीती बदलण्याची शक्यता आहे. शेतकर्‍यांशी आणि ग्रामीण अर्थकारणाशी थेट जोडलेल्या जिल्हा बँकेत उदय सामंत यांच्या प्रवेशामुळे सहकारातील राजकीय समीकरणे पूर्णपणे बदलून जाणार आहेत. येत्या दिवसांत या निवडणुकीचा रंग आणखी कसा भरतो, याकडे संपूर्ण जिल्ह्याचे लक्ष लागले आहे.