नवी मुंबई आंतरराष्ट्रीय विमानतळावर स्वर्ल ट्रान्झिट हॉटेलची सुविधा

2026-10-09 00:00:00

टाइम्स स्पेशल

पनवेल/नवी मुंबई (प्रतिनिधी) - भारतातील सर्वात मोठ्या खासगी विमानतळ संचालकांपैकी एक असलेल्या अदानी एअरपोर्ट होल्डिंग्स लिमिटेडने नवी मुंबई आंतरराष्ट्रीय विमानतळावर स्वर्ल ट्रान्झिट हॉटेल सुरू केले आहे. ८० खोल्यांच्या या ट्रान्झिट हॉटेलमुळे प्रवाशांना विमानतळाच्या परिसरातच विश्रांती घेणे, ताजेतवाने होणे किंवा काम करणे शक्य होणार आहे. टर्मिनल १ च्या आगमन स्तरावर असलेले हे दोन मजली हॉटेल दीर्घ प्रतीक्षाकाळ असलेले प्रवासी, पहाटेच्या विमानाने प्रवास करणारे प्रवासी, उशिरा विमानतळावर पोहोचणारे प्रवासी तसेच अल्पकालीन मुक्कामाची गरज असलेल्यांसाठी उपयुक्त ठरणार आहे. प्रवाशांना चार तासांचा किंवा रात्रभराचा मुक्काम निवडता येणार असून, शॉवर सुविधा, भोजनसेवा आणि हॉटेलमधील विविध सुविधा उपलब्ध असतील.

https://ratnagiritimes.in//assets/images/2020/add/2020/sky22.jpg

स्वर्ल ट्रान्झिट हॉटेलमध्ये सहा श्रेणींमध्ये एकूण ८० खोल्या आहेत. या खोल्यांचे क्षेत्रफळ १३० चौरस फुटांपासून ४१० चौरस फुटांपर्यंत आहे. यामध्ये सुपीरियर सिंगल, सुपीरियर डबल, सुपीरियर ट्विन, सुपीरियर क्सेसिबल, ज्युनियर सुइट आणि एक्झिक्युटिव्ह सुइट या प्रकारांचा समावेश आहे. स्वर्ल ट्रान्झिट हॉटेलमध्ये उच्च-गती इंटरनेट सुविधा, स्मार्ट दूरचित्रवाणी संच, स्वतंत्र कामाचे टेबल, इलेक्ट्रॉनिक तिजोरी, चहा-कॉफीची सुविधा, दर्जेदार बेड आणि बाथ लिनेन, प्रसाधन साहित्य तसेच खोलीत भोजनसेवा उपलब्ध आहे. याशिवाय तातडीची कपडे धुण्याची सेवा, द्वारपाल सेवा, २४ तास गृहव्यवस्था, विमानतळावरून आणणे-नेणे आणि जागे करण्याची सेवा उपलब्ध करून देण्यात आली आहे. या हॉटेलमध्ये ४० आसनक्षमतेचे २४ तास सुरू असलेले रेस्टॉरंट आहे. यासोबतच चोवीस तास खोलीत भोजनसेवा, त्वरित घेऊन जाता येणारे खाद्यपदार्थ तसेच बारची सुविधा उपलब्ध आहे. स्वर्ल ट्रान्झिट हॉटेलचा प्रारंभ हा विमानतळांच्या नेटवर्कमध्ये बिगर-विमानतळ सेवांचा विस्तार करण्याच्या व्यापक प्रयत्नांचा एक भाग आहे. या माध्यमातून प्रवाशांसाठी अधिक पर्याय उपलब्ध करून देण्याबरोबरच विमानतळाच्या परिसरात उपलब्ध सेवांची व्याप्तीही वाढवली जात आहे.