विजयदुर्गच्या समुद्रात अनधिकृत पर्ससीन मासेमारी करणार्‍या नौकेवर कारवाई

2026-09-28 00:00:00

टाइम्स स्पेशल

देवगड (प्रतिनिधी) - महाराष्ट्र सागरी मासेमारी अधिनियमाचे उल्लंघन करत अवैध पद्धतीने पर्ससीन मासेमारी करणाऱ्यांवर सिंधुदुर्ग जिल्ह्यात कठोर कारवाई सुरू आहे. विजयदुर्ग जेट्टीसमोर तीन वाव पाण्यात अवैध पर्ससीन मासेमारी करताना रत्नागिरी येथील नौका मालक अर्शद अ. लतीफ पावसकर यांची ‘SAAD MAAZ’ (नोंदणी क्रमांक IND-MH-4-MM-3731) ही नौका जप्त करण्यात आली. सहाय्यक आयुक्त मत्स्यव्यवसाय, सिंधुदुर्ग यांच्या मार्गदर्शनाखाली अंमलबजावणी अधिकारी तथा परवाना अधिकारी देवगड किरण वाघमारे यांनी सुरक्षा रक्षकांच्या मदतीने ही कारवाई केली.

https://ratnagiritimes.in//assets/images/2020/add/2020/sky22.jpg

नौकेची तपासणी केली असता एकूण २० परप्रांतीय खलाशी आढळून आले. महाराष्ट्र सागरी मासेमारी अधिनियम, १९८१ च्या तरतुदींचे स्पष्ट उल्लंघन करत अवैध पद्धतीने मासेमारी केल्याचे निष्पन्न झाले. नौका ताब्यात घेऊन देवगड बंदरात आणण्यात आली आहे. अधिनियमांतर्गत तात्काळ कायदेशीर कार्यवाही सुरू करण्यात आली असून दोषींवर कठोर कारवाई केली जाईल, असे अधिकाऱ्यांनी स्पष्ट केले. ही दुसरी अशी कारवाई आहे. चार-पाच दिवसांपूर्वीच परवाना अधिकारी यांनी एका पर्ससीन नौकेवर कारवाई केली होती. अवैध मासेमारी करणाऱ्यांच्या धाब्यांना दणाणा दिला जात असल्याचे सांगत वाघमारे यांनी पत्रकारांशी बोलताना सांगितले, “परवान्यात निर्दिष्ट केलेल्या क्षेत्राच्या बाहेर कोणीही मासेमारी केल्यास कडक कारवाई केली जाईल. कायद्याचे उल्लंघन सहन केले जाणार नाही.”

टाईम्स स्पेशल

स्थानिक मच्छीमारांनी या कारवाईचे स्वागत केले आहे. १२ समुद्री मैल अलीकडे कोणतीही परवानगी नसताना अश्या पर्ससीन मासेमारीमुळे स्थानिक पारंपरिक मच्छीमारी आणि सागरी जैवविविधतेवर परिणाम होत असल्याची तक्रार दीर्घकाळापासून होती. प्रशासनाने आता नियमित पाळत ठेवून कठोर अंमलबजावणीचा संदेश दिला आहे.